Пра рэбрэндынг «Новай Беларусі» распавёў у Фэйсбуку яе сузаснавальнік Павел Лібер. Цяпер замест адной аплікацыі будзе прыкладанне «SVAE» і ўэб-сайт грамадзянска-палітычнае платформы «Тры Сланы», што запусцяць найбліжэйшымі 2–3 тыднямі.
Неабходнасць змяненняў Павел Лібер патлумачыў тым, што «Новая Беларусь» зрабілася занадта вялікаю і перагружанаю.
,,«Дзіцячыя казкі змешваліся з дэмакратычнай канферэнцыяй, і не тое, каб было лёгка пераблытаць, але мы пастанавілі, што хочам зрабіць прыкладанне больш лёгкім і арыентаваным на дыяспару, пагатоў у Беларусі мы не рэкамендуем ім карыстацца», – пракаментаваў рэбрэндынг Лібер і зазначыў, што прыкладанне зрабілася толькі лепшым.
Пасля абнаўлення ў аплікацыі з’явіліся медыя-агрэгатар з тонкімі наладамі (можна зменшыць колькасць негатыўных ці палітычных навінаў) і групы навінаў, новы АІ-пошук, рэжым хуткага прагляду падзеяў і сустрэчаў у фармаце сторыз, а таксама палепшылася секцыя «Грамадства», адкуль ахвочыя маюць магчымасць узяць удзел у грамадзянскіх праектах.
«Памятайце, што вы можаце рабіць гэта ананімна, не пакідаючы ніякіх персанальных звестак», – абяцае Павел Лібер.
Пра платформу «Тры Сланы» яе заснавальнікі распавядуць пазней асобна, але, паводле Лібера, гэта будзе «сапраўдная грамадзянска-палітычная прастора з дыялогамі, публічнымі дыскусіямі, грамадзянскімі падзеямі і г.д.».
Рэбрэндынг і падзел аніяк не змяняюць місіі платформы «Новая Беларусь» – каманда працягвае працаваць над тым, каб беларусы і беларускі аб’ядноўваліся і вучыліся развязваць свае праблемы і падтрымліваць адзін аднаго ў любым пункце свету, кажа сузаснавальнік аплікацыі:
,,«Мы працягваем развіваць усю экасістэму, у якой ужо больш за дзясятак розных прадуктаў, што дапамагаюць людзям у вельмі розных сітуацыях і прасоўваюць культуру грамадзянскай супольнасці і адказнасці за сваю нацыю».
Павел Лібер распавёў таксама, што ягоная каманда працягвае рабіць падатковы праект «Будуй Сваё», што вучыць беларусаў развязваць свае праблемы без удзелу палітыкаў, донараў і т.п. Гэты праект арганізоўвае людзей на стварэнне і падтрыманне розных беларускіх ініцыятываў, такіх як бібліятэка ў Вільні ці партал пра гісторыю Беларусі для англійскамоўнай аўдыторыі.
Лібер заклікае беларусаў падтрымаць праекты сваёй каманды штомесячнай падпіскаю ці аднаразовым данатам, бо фінансаваць іх усё складаней, асабліва пасля прыпынення дапамогі з боку ЗША.
Каб скарыстацца аплікацыяй «SVAE», яе трэба ўсталяваць на мабільны тэлефон. Калі ў вас усталяваная «Новая Беларусь», яе трэба абнавіць.
У студзені 2023 года «Новая Беларусь» была прызнаная беларускімі ўладамі «экстрэмісцкім фармаваннем».
Марыя Міхалевіч belsat.eu
