За «распаўсюд экстрэмізму» будуць судзіць Віктара Вялюгу – дырэктара ГЦ «Беларусь» у Віцебску, дзе 13 снежня 2024 года здарыўся моцны пажар, паведамляе «Віцебская вясна».
«Хапіла б і мясцовых уладаў». У мітусні начальства пасля пажару ў Віцебску ўбачылі перадвыбарчы піяр
Разгляд справы паводле ч. 2 арт. 19.11 КаАП РБ пройдзе 19 лютага ў судзе Чыгуначнага раёну Віцебску. Суддзёй прызначаная Кацярына Цыбульская – сёлета пераважна ёй аддаюць палітычныя «адміністратыўкі» ў Віцебску, зазначаюць праваабаронцы.
Віктар Вялюга – вядомы ў Віцебску бізнесовец. Ён быў затрыманы неўзабаве пасля пажару ў гандлёвым цэнтры, але пазней, імаверна, яго адпусцілі на волю.
Пажар у ГЦ «Беларусь» у Віцебску адбыўся 13 снежня 2024 года. Падчас яго былі эвакуяваныя каля 200 асобаў. Плошча пажару склала 2 тысячы квадратных метраў. З агнём давялося змагацца 5 гадзінаў. У выніку пажару пацярпелі 20 асобаў: пра 16 было вядома ў дзень здарэння, пазней яшчэ 4 асобы звярнуліся па псіхалагічную дапамогу.
Паводле папярэдняй версіі следчых, загаранне здарылася праз тое, што пераробленая аўтаправодка была ненадзейнай. Аднак яшчэ ў 2018 годзе пасля трагедыі ў расейскім Кемераве, дзе падчас пажару ў гандлёвым цэнтры «Зімовая вішня» загінулі 60 чалавек, у віцебскай «Беларусі» зладзілі правяранні і масавых парушэнняў не знайшлі. Паведамлялася толькі, што не ва ўсіх памяшканнях быў чутны сігнал пажарнай трывогі.
Ці прызналі адказным за парушэнні ўладальніка, невядома.
Марыя Міхалевіч belsat.eu
