25-адсоткавыя мыты на сталь і алюміній, уведзеныя без вынятку, маюць набыць моц 4 сакавіка. Гэтыя мыты ўдараць найперш па суседзях ЗША.
Прэзідэнт Злучаных Штатаў Доналд Трамп падпісаў 10 лютага ўказ аб увядзенні 25-адсоткавых мытаў на сталь і алюміній, піша «Reuters». Трамп ужо ўводзіў мыты на сталь і алюміній у 2018 годзе, але тады былі выключэнні для ключавых гандлёвых партнёраў (Канады, Мексікі, Бразіліі і іншых), а мыты на алюміній з 2018 года складалі 10 %.
Мыты зробяць алюміній і сталь даражэйшымі для пакупнікоў у ЗША, але найперш удараць па суседніх Канадзе і Мексіцы. Каля чвэрці сталі, што спажываюць Штаты, гэта імпарт, а найбуйнейшыя пастаўнікі сталі ў ЗША – Канада, Бразілія, Мексіка і Паўднёвая Карэя. З імпартаванага ў ЗША алюмінію каля 80 % паходзіць з Канады.
«Нам гэтага не трэба з іншай краіны, – сказаў Трамп у час падпісання ўказу. – Напрыклад, Канада. Калі мы робім гэта ў Злучаных Штатах, нам не трэба, каб гэта было зробленае ў Канадзе. Мы будзем мець працу. Вось чаму Канада мусіць быць нашым 51-м штатам».
У атачэнні Трампа раней казалі, што мыты на алюміній і сталь нібыта скіраваныя найперш супраць Кітаю і Расеі.
Канада лічыць мыты беспадстаўнымі (і не хоча станавіцца 51-м штатам). Міністр прамысловасці Канады Франсуа-Філіп Шампань заявіў, што ўрад будзе кансультавацца з іншымі замежнымі партнёрамі і працягне падтрымліваць сваю прамысловасць. Ён заявіў, што канадскія сталь і алюміній – «ключавыя інгрэдыенты» амерыканскіх абароны, энергетыкі, машынабудаўніцтва і караблебудаўніцтва. Пра мыты ў адказ Канада на момант публікацыі не паведамляла.
Мексіка на момант публікацыі не адрэагавала на мыты. Незадоўга да ўвядзення мытаў прэзідэнтка Кляўд’я Шэйнбаўм давала прэс-канферэнцыю, але на ёй сказала, што будзе чакаць афіцыйнай пастановы, бо пра планы на мыты даведалася з навінаў.
Раней Трамп абвясціў увядзенне 25-адсоткавых мытаў на ўвесь імпарт з Мексікі і Канады, але пагадзіўся прыпыніць іх на месяц. Таксама Трамп увёў 10-адсоткавыя мыты на тавары з Кітаю (хоць у перадвыбарчай кампаніі абяцаў 60 %). Акрамя таго, Трамп скасоўваў, але затым паставіў на паўзу скасаванне бязмытавага ўвозу ў ЗША пасылак цаной да 800 долараў. Супраць Еўразвязу Трамп пакуль толькі пагражае ўвесці мыты.
«The Wall Street Journal» называў гандлёвую палітыку Трампа «найдурнейшай гандлёвай вайной у гісторыі». CNN жа адзначае, што за мытамі, пры ўсёй іх спрэчнасці, ёсць пэўная логіка: ЗША маюць дэфіцыт бюджэту праз ініцыяванае Трампам зніжэнне падаткаў (а Трамп хоча знізіць падаткі яшчэ больш), і паралельна Трамп спадзяецца атрымаць ад іншых краінаў нейкія саступкі дзеля перадухілення мытаў. BBC тым часам задаецца пытаннем, ці не перастане існаваць «свет свабоднага гандлю», які ўсталяваўся пасля Другой сусветнай вайны, і тлумачыць, як мыты зробяць не таннейшымі, а толькі даражэйшымі амерыканскія тавары, напрыклад, аўтамабілі.
Алесь Наваборскі belsat.eu
