Спецыяльны пасланнік прэзідэнта ЗША ў асаблівых місіях Рычард Грэнэл, а таксама паплечнік Доналда Трампа Ілан Маск, які ўзначальвае нядаўна створаны Дэпартамент эфектыўнасці дзяржаўнага кіравання (DOGE), хочуць закрыць радыё «Свабода» і «Голас Амерыкі».
Рычард Грэнэл у сваім блогу ў X прапанаваў спыніць дзяржаўнае фінансаванне для «Радыё Свабодная Еўропа / Радыё Свабода» і «Голас Амерыкі», бо гэтыя медыі «запоўненыя вельмі левымі актывістамі». Дый агулам, паводле яго, медыі, фінансаваныя дзяржавай, – «перажытак мінулага».
Ягоны пост падтрымаў Ілан Маск, схлусіўшы пры гэтым пра сумы іх фінансавання:
,,«Так, зачыніце іх. Еўропа цяпер вольная (не лічачы задушлівай бюракратыі). Алё? Іх больш ніхто не слухае. Гэта проста радыкальныя левыя варʼяты, якія размаўляюць самі з сабой, спальваючы пры гэтым 1 мільярд долараў у год з падаткаў амерыканцаў».
«Радыё Свабодная Еўропа / Радыё Свабода» (Radio Free Europe / Radio Liberty) і «Голас Амерыкі» (Voice of America) былі створаныя ў 1949 і 1942 гадах, у тым ліку – як сродкі змагання з камуністычнай і нацысцкай прапагандай. Радыё «Свабода» выдае навіны для 27 краінаў на 23 мовах, «Голас Амерыкі» – на 48 мовах. Іх супольны бюджэт за 2024 год складаў каля 391 мільёнаў долараў, што ў два з паловай разу менш, чым сказаў Маск. Беларуская служба радыё «Свабода» была заснаваная ў 1954 годзе.
Прэзідэнт Злучаных Штатаў Доналд Трамп 21 студзеня падпісаў указ наконт прыпынення ўсіх праграмаў дапамогі ЗША іншым краінам на 90 дзён. Сярод іншага была прыпыненая і дапамога, якую атрымлівалі беларускія медыі.
Якуб Хруст belsat.eu
