Лідар Паўночнай Карэі Кім Чэн Ын падчас візіту ў Міністэрства абароны КНДР 8 лютага з нагоды дня заснавання паўночнакарэйскай арміі выказаўся з нагоды вайны Расеі супраць Украіны.
«Армія і народ КНДР нязменна будуць падтрымліваць і заахвочваць справядлівую справу расейскай арміі і народу ў абароне свайго суверэнітэту, бяспекі і тэрытарыяльнай цэласці ў адпаведнасці з духам дамовы аб усебаковым стратэгічным партнёрстве паміж КНДР і Расеяй», – сказаў ён, перадае «Reuters».
Кім Чэн Ын таксама сказаў, што разгортванне ЗША ядравых стратэгічных сродкаў, вайсковыя вучэнні і вайсковая супраца з Японіяй і Паўднёвай Карэяй выклікаюць ваенны дысбаланс у рэгіёне і ствараюць сур'ёзную праблему для бяспекі.
«КНДР не хоча непатрэбнай напружанасці рэгіянальнай сітуацыі, але будзе прымаць контрмеры для забеспячэння рэгіянальнага ваеннага балансу», – заявіў кіраўнік КНДР, паабяцаўшы «непахісную палітыку больш высокага развіцця ядравых сілаў».
Паводле сцверджанняў Украіны, ЗША і Паўднёвай Карэі, Пхеньян выправіў у расейскае войска больш за 10 тысячаў жаўнераў. За гэта Крэмль дзеліцца з КНДР касмічнымі і спадарожнікавымі тэхналогіямі, казаў кіраўнік Дзярждэпу Энтані Блінкен. Страты паўночнакарэйскіх войскаў, якія ваююць супраць ЗСУ ў Курскай вобласці РФ, ацэньваюцца ў 4 тысячы.
Якуб Хруст belsat.eu
