8 лютага Асацыяцыя беларускага бізнесу за мяжой ABBA назвала лаўрэатаў IV прэміі «Бізнес вольнай Беларусі». Пераможцы ў пяці намінацыях «Free Belarus Business Awards» атрымалі па 5 тысяч еўра. Найлепшым бізнесам года былі прызнаныя стваральнікі беларускага мерчу «Znivien» («Жнівень») Уладзімір Маляўка і Павел Дзеркач.
Цырымонія ўзнагароджання пераможцаў конкурсу «Free Belarus Business Awards» прайшла ў камернай атмасферы ў варшаўскім бары «Connect».
Праект зачыняецца – конкурс працягваецца
«Гэты праект распачаўся два гады таму пры падтрымцы і фінансаванні Еўразвязу. І вялікі дзякуй, што мы змаглі яго ажыццявіць. Гэта была мая мара. А конкурс «Free Belarus Business Awards» – мой самы любімы праект у межах ABBA. Я вельмі спадзяюся, што ў будучыні ягоны прызавы фонд будуць фармаваць самі беларусы, а конкурс стане нацыянальным», – сказала ва ўступным слове віцэ-прэзідэнтка Асацыяцыя беларускага бізнесу за мяжой ABBA Марына Гірын.
Як патлумачыла потым «Белсату» Марына Гірын, вялікі праект, у межах якога было праведзена чатыры конкурсы, зачыняецца. Але гэта не значыць, што «Free Belarus Business Awards» больш ніколі не адбудзецца. Конкурс працягнецца.
«Мы ўжо падпісалі новы кантракт з Еўракамісіяй. Але конкурс будзе выглядаць троху па-іншаму. Калі дакладней, ён будзе праходзіць раз на год, а не два разы, як было раней. А пераможцы будуць атрымліваць не матэрыяльныя прызы, а магчымасць удзелу ў адукацыйных праграмах. Мы якраз зараз гэта распрацоўваем і неўзабаве раскажам больш падрабязна», – абяцае Марына Гірын.
Пераможцы IV конкурсу «Free Belarus Business Awards»
Віцэ-прэзідэнтка ABBA назвала пераможцаў чацвёртага конкурсу «Free Belarus Business Awards» у пяці намінацыях. Кожны з лаўрэатаў атрымаў у якасці прызу 5 тысяч еўра.
- Некамерцыйная арганізацыя года – Беларускі моладзевы хаб (Варшава).
- Сацыяльнае прадпрыемства года – Еўрапейскі інстытут сучаснай псіхатэрапіі (EIMP) у Вільні.
- Інавацыйны бізнес года – фірма «Althouse» з Варшавы (вытворчасць будаўнічых матэрыялаў).
- Брэнд года – кавярня «Кава і людзі» («Kawa i Ludzie») ў Сопаце.
- Найлепшы бізнес года – праект беларускага адзення «Жнівень» («Znivien»).
Па словах арганізатараў, у чацвёртым конкурсе «Free Belarus Business Awards» бралі ўдзел 50 беларускіх бізнесаў у выгнанні. Пераможцаў сярод удзельнікаў выбірала міжнароднае журы, у склад якога ўваходзілі, у прыватнасці, вядомы бізнесовец і эксперт у гульнявой індустрыі Джон Гудэйл (John Goodale), экспертка ў сферы IT і гендырэктарка фундацыі «Res Futuro» Юстына Орловска (Justyna Orłowska), менеджарка і кіраўніца інавацыйных праектаў Олена Коліхава, заснавальніца і генеральная дырэктарка «Outwith Reality» Чарлі Харборд (Charlie Harbord).
«Адзенне супраць дыктатуры»
«Ну, слухайце, калі мы зараз спытаем наведнікаў гэтага бару, ці яны бачылі майкі або худзі з надпісам «Make Belarus zaebis again», то я ўпэўнены, што, як мінімум, палова людзей адкажа: канешне! А некаторыя нават надзелі нешта нашае на гэтае ўзнагароджанне. Гэта самы папулярны наш прынт, які асацыюецца з брэндам «Znivien», – запэўнівае аўтара гэтых радкоў адзін са стваральнікаў «Жніўня» Уладзімір Маляўка.
«Znivien» нарадзіўся на эміграцыі ў 2021 годзе, у Кракаве. «Жнівень» – гэта не проста брэнд адзення, гэта маніфест свабодных людзей, якія выбралі змаганне з дыктатурай і вернасць сабе, сцвярджаюць яго стваральнікі Уладзімір Маляўка і Павел Дзеркач.
На думку Паўла Дзеркача, аўтарытэтнае журы назвала «Znivien» найлепшым бізнесам мінулага года, таму што брэнд стаўся пазнавальным і штогод дэманструе рост.
«Напрыклад, летась мы выраслі на 40 %, і гэта нямала. Па-другое, наш бізнес крэатыўны і нацыянальна арыентаваны. Гэта нашая разынка. Нагадваем людзям, якія эмігравалі ў іншыя краіны, аб радзіме. І гэта можна назваць нейкім сацыяльным складнікам нашага бізнесу і нашага поспеху», – кажа Павел.
,,Як сцвярджаецца на сайце прадпрыемства, з 2021 года «Жнівень» рэалізаваў больш за 1500 рэчаў – футболак, світшотаў, худзі, кепак ды іншага «адзення вольных людзей».
«Беларуская якасць паводле еўрапейскіх стандартаў»
Знаёмімся з заснавальніцай і дырэктаркай Еўрапейскага інстытуту сучаснай псіхатэрапіі ў Вільні Ганнай Матуляк – лаўрэаткай конкурсу «Free Belarus Business Awards» у намінацыі «Сацыяльнае прадпрыемства года». Інстытут EIMP быў створаны ў Вільні ўлетку 2023 года. Праект, па словах дырэктаркі інстытуту, разлічаны на тое, каб беларусы, якія з'ехалі з краіны, мелі магчымасць атрымаць адукацыю гештальт-тэрапеўта на зразумелай для іх мове.
«І гэта цяпер магчыма. Навучанне працягваецца чатыры з паловай гады. Як бачыце, гэта не нейкія кароткатэрміновыя курсы. Фактычна – універсітэцкі курс. Мы зрабілі ўсё, каб гэта сапраўды было сур'ёзна, грунтоўна і ў адпаведнасці з еўрапейскімі стандартамі», – распавядае Ганна Матуляк.
Еўрапейскі інстытут сучаснай псіхатэрапіі знаходзіцца ў рэестры навучальных установаў Літвы і з'яўляецца сябрам Еўрапейскай асацыяцыі гештальт-тэрапіі, удакладняе заснавальніца ўстановы.
«Нашыя асноўныя каштоўнасці – гэта якасць. Такая, ведаеце, беларуская якасць паводле еўрапейскіх стандартаў», – падкрэслівае Ганна Матуляк.
Навучанне ў інстытуце – стацыянарнае. Але спадарыня Ганна тлумачыць, што сёлета вучыцца ў EIMP на псіхатэрапеўта можна будзе не толькі ў Вільні, але і ў Варшаве. Маецца памяшканне, а міжнародная каманда выкладчыкаў ужо гатовая да працы. Група студэнтаў невялікая – дзевяць чалавек. Але калі хто мае жаданне, да 23 лютага можа яшчэ да яе далучыцца: трэба падаць заяўку на сайце EIMP. Год навучання каштуе 2750 еўра.
«Кава і Людзі»
Ці будзе мець псіхатэрапеўтычны эфект кубачак духмянай кавы ва ўтульнай беларускай кавярні? Рытарычнае пытанне. Асабліва калі пад каву падаюць беларускія сырнікі, медавікі ці арэшкі са згушчонкай, а да мора – рукой дастаць.
Пра кавярню ў Сопаце «Кава і Людзі» («Kawa i Ludzie»), якая стала пераможцам у намінацыі «Брэнд года», распавяла нам беларуска Кацярына – сузаснавальніца бізнесу. Гэтая маленькая і вельмі ўтульная кавярня месціцца на вуліцы Oborońców Westerplatte, 2 у Сопаце. Яна адкрылася два гады таму, і калі на самым пачатку асноўнымі наведнікамі былі беларусы, то цяпер яе наведвае шмат палякаў. Нашыя арэшкі і сырнікі прыйшліся да густу, палякі ўсмакавалі беларускую якасць.
Грошы, атрыманыя за перамогу ў конкурсе «Free Belarus Business Awards», уладальніцы «Kawa i Ludzie» плануюць укласці ў развіццё праекту.
Асноўныя кліенты беларускага прадпрыемства «Althouse» – таксама палякі. Фірма спецыялізуецца на «альтэрнатыўнай будоўлі дамоў» з выкарыстаннем штучнага інтэлекту.
«Хочам пайсці ў распрацоўку разумных дамоў», – кажа нам стваральнік «Althouse».
У Беларусі да 2020 года заснавальнікі фірмы займаліся ўсталяваннем нацяжных столяў, у Польшчы самі сталі распрацоўнікамі і вытворцамі нацяжных сістэмаў. Апошнім заказчыкам у Варшаве была вядомая сетка «Marriott». Перамога ў намінацыі «Інавацыйны бізнес года» дапаможа ў адкрыцці адукацыйнага цэнтру і распрацоўцы новага прадукту, сцвярджае кіраўнік праекту.
«Важную ролю адыграла нашае добрае імя»
Віншуем з перамогай сярод некамерцыйных арганізацыяў і кіраўніка Беларускага моладзевага хабу Алеся Лапко.
«Насамрэч 5 тысяч еўра нам хопіць на аплату арэнды на адзін месяц. Усяго толькі. Але спадзяюся, што на арэнду мы знойдзем грошы з іншых крыніцаў, а гэтыя пойдуць на арганізацыю нейкіх важных мерапрыемстваў для беларусаў. Бо ў лютым пачынаецца Тыдзень роднай мовы, у сакавіку – Дзень волі. Магчыма, мы падтрымаем яшчэ і нашых партнёраў. Калі глабальна, то гэта невялікія грошы, але адносна нейкіх важных невялікіх справаў – добрая падтрымка. Таму мы са сваёй камандай будзем раіцца, куды яны пойдуць, і зможам публічна распавесці, як мы з іх скарысталіся», – кажа Алесь Лапко.
На ягоную думку, перамога Беларускага моладзевага хабу ў конкурсе заслужаная. Гэта прызнанне міжнародным журы ўнёску Моладзевага хабу ў беларускую справу за некалькі гадоў.
«Гэта прызнанне і для нашай каманды, і для нашых валанцёраў, але і для ўсіх нашых сяброў, якія нас шмат падтрымліваюць. І нашае добрае імя адыграла важную ролю ў рашэнні журы», – мяркуе Алесь Лапко.
2025 год можа стаць прарыўным у кірунку міжнароднага супрацы Беларускага моладзевага хабу з польскімі арганізацыямі, кажа ягоны кіраўнік.
Нагадаем, што ў 2024 годзе пераможцамі ІІІ конкурсу «Бізнес вольнай Беларусі» сталі кампанія «GlaBus» (стварэнне экалагічна чыстых матэрыялаў для дарожнага будаўніцтва), а таксама кампанія «LYN cosmetics» і выдавецтва «Gutenberg Publisher».
Зміцер Міраш belsat.eu
