Музыка Ягор Бортнік, больш вядомы як Лёва Бі-2, расказаў у сваім акаўнце ў Instagram, што да яго звярталіся пранкеры Ваван і Лексус (Уладзімір Кузняцоў і Аляксей Сталяроў), шчыльна звязаныя з расейскімі спецслужбамі.
Як вынікае з допісу музыкі, пранкеры хацелі выцягнуць яго ў Італію, у горад Турын.
,,«Я не ведаю, што мяне магло чакаць у Турыне, але думаю, нічога добрага. Пракалоліся яны хутка, бо яны звычайныя двоечнікі, якія пад выглядам рэлігійных габрэяў, якія прапаноўваюць паўмільёна долараў, прызначылі сустрэчу ў суботу [у шабат у юдаізме забароненая ўсялякая дзейнасць, у тым ліку, напрыклад, карыстанне тэлефонам або ўключэнне электрычнасці]», – паведаміў Лёва Бі-2.
Паводле яго, перамовы вяліся ад імя «фэйкавага» расейскага журналіста Алега Кашына, «што высветлілася хутка». Таксама яны тэлефанавалі з нумара, які ўжо выкарыстоўвалі ў пранку з былым амбасадарам ЗША ў Маскве Майклам Макфолам – «грошай няма на новую сімку».
Лідары «Би-2» – Лёва і Шура – нарадзіліся ў Беларусі і падтрымліваюць дэмакратычныя змены на радзіме. У Расеі музыкам пагражае крымінальны пераслед за антываенную пазіцыю. За мяжой удзельнікі гурта сутыкнуліся з адменаю канцэртаў праз ціск расейскіх дыпламатаў. У студзені 2024 года ў Тайландзе гурт некалькі дзён трымалі ў міграцыйнай турме і збіраліся дэпартаваць у Расею, але гэтага ўдалося пазбегчы дзякуючы намаганням ізраільскага МЗС і медыйнаму розгаласу.
Якуб Хруст belsat.eu