У 2025 годзе ў Менску працягнецца кансервацыя ўсіх смеццеправодаў у шматпавярховіках. Пра гэта паведамілі ў Менскай гарадской жыллёвай гаспадарцы.
Як перадае «Минск-Новости», сёлета плануецца закансерваваць больш як 1,8 тыс. смеццеправодаў у межах Нацыянальнай стратэгіі абыходжання з цвёрдымі камунальнымі адкідамі і другаснымі матэрыяльнымі рэсурсамі.
Камунальнікі заяўляюць, што «без згоды жыхароў кансервацыя забараняецца» – для закрыцця смеццеправодаў неабходная пастанова, прынятая ўдзельнікамі супольнага домаўладання.
У менскіх шматпавярховіках цяпер функцыянуе больш як 7 тыс. смеццеправодаў. Летась закрылі каля 200.
Неабходнасць закрыцця смеццеправодаў тлумачыцца тым, што з часам канструкцыя пакрываецца брудам і робіцца крыніцаю хваробатворных бактэрыяў і мікробаў. З'яўляецца непрыемны пах, могуць узнікнуць шум ці пажар. Да таго ж, жыхары дамоў са смеццеправодам, як правіла, не сартуюць адкіды, нават калі ў двары ёсць кантэйнеры для іх раздзельнага збору.
Альтэрнатываю смеццеправодам камунальнікі назвалі модульныя кантэйнерныя пляцоўкі закрытага тыпу. У 2024 годзе ўстанавілі 742 канструкцыі, а сёлета плануецца паставіць яшчэ 711.
Нагадаем, што ўлады пачалі змагацца з прыватнымі пансіянатамі для пажылых людзей яшчэ ў 2024 годзе, тлумачылі гэта санітарным станам установаў. Пры гэтым дзяржаўныя пансіянаты яшчэ горшыя за прыватнікаў.
Якуб Хруст belsat.eu
