Прэзідэнт ЗША Доналд Трамп размаўляў з расейскім кіраўніком Уладзімірам Пуціным па тэлефоне, каб паспрабаваць дамовіцца аб спыненні вайны ва Украіне. Пра гэта ён паведаміў «New York Post» у эксклюзіўным інтэрв'ю 7 лютага.
Амерыканскі палітык адмовіўся казаць, колькі разоў ён размаўляў з кіраўніком РФ. Пры гэтым ён заявіў, што Уладзімір Пуцін «неабыякавы» да забойстваў на полі бою і «хоча, каб людзі перасталі паміраць».
,,«Усе гэтыя мёртвыя людзі. Маладыя, маладыя, прыгожыя людзі. Яны як твае дзеці, іх два мільёны – і без прычыны», – сказаў Доналд Трамп.
Паводле яго, вайна ва Украіне «ніколі б не адбылася», калі б ён быў прэзідэнтам у 2022 годзе, бо ў яго «заўсёды былі добрыя стасункі з Пуціным». Трамп заявіў, што ў яго ёсць канкрэтны план спынення вайны.
Звяртаючыся да дарадцы ў пытаннях нацыянальнай бяспецы Майка Ўолца, Трамп сказаў пачаць «гэтыя сустрэчы», «яны хочуць сустрэцца».
Віцэ-прэзідэнт Джэй Дзі Вэнс сустрэнецца з прэзідэнтам Украіны Уладзімірам Зяленскім на Мюнхенскай канферэнцыі па бяспецы на наступным тыдні. Трамп заявіў, што хоча заключыць з Кіевам здзелку на 500 мільёнаў долараў на доступ да рэдказямельных мінералаў і газу ва Украіне ў абмен на гарантыі бяспекі пры любым магчымым мірным урэгуляванні.
Таксама Трамп сказаў, што «хацеў бы, каб з Іранам была заключана здзелка па бязʼядравай энергетыцы». Гэта, паводле яго, лепш, «чым разбамбіць яго».
У Крамлі не пацвярджаюць, але і не адмаўляюць
Прэс-сакратар кіраўніка РФ Дзмітрый Пяскоў заявіў ТАСС, што не можа ні пацвердзіць, ні зняпраўдзіць публікацыі пра кантакты Пуціна і Трампа адносна Украіны.
«Што можна сказаць адносна гэтай навіны: па меры таго як адміністрацыя ў Вашынгтоне разгортвае сваю працу, узнікае шмат розных камунікацыяў. І гэтыя камунікацыі вядуцца па розных каналах. І вядома, на фоне множнасці гэтых камунікацыяў я асабіста магу чагосьці не ведаць, быць не ў курсе чагосьці. Таму ў дадзеным гэта я не магу гэта ні пацвердзіць, ні зняпраўдзіць», – сказаў ён, адказваючы на пытанне, ці адбылася тэлефонная размова Пуціна і Трампа пасля інаўгурацыі амерыканскага лідара.
Спецыяльны пасланнік прэзідэнта ЗША Кіт Келаг распавёў пра планы спынення вайны ва Украіне. Ён заявіў, што і Кіеву, і Маскве давядзецца пайсці на саступкі, каб «спыніць забойствы прамысловага маштабу».
Што тычыцца цяперашніх санкцыяў супраць Расеі, Келаг ацаніў іх эфектыўнасць на тры балы паводле 10-бальнай шкалы. Пры гэтым ён адзначыў, што менавіта амерыканскія санкцыі, скіраваныя на энергетычны сектар Расеі, ёсць больш эфектыўнымі, але ўсё яшчэ маюць патэнцыял для ўзмацнення.
Якуб Хруст belsat.eu
