навіны

У Беларусь забаранілі імпартаваць скуру. На ўвоз трэба атрымліваць дазвол «Беллегпраму»

Скураная куртка беларускай вытворчасці
Скураная куртка беларускай вытворчасці. Фота: Slavianka.by
podpis źródła zdjęcia

Урад Беларусі ўвёў ліцэнзаванне імпарту ў Беларусь буйной рагатай жывёлы. Імаверна, модныя скураныя тавары падаражэюць.

Савет Міністраў прыняў пастанову аб ліцэнзаванні імпарту ў Беларусь скуры буйной рагатай жывёлы. Дакумент апублікавалі 8 лютага на «Pravo.by». Ён набудзе моц 9 сакавіка, будзе дзеяць паўгода, калі абмежаванні не прадоўжаць ці не скасуюць.


На імпарт скуры трэба будзе атрымліваць разавыя ліцэнзіі, што мае выдаваць Міністэрства гандлю на ўзгадненне з канцэрнам «Беллегпрам». Каб набыць ліцэнзію, спачатку трэба атрымаць лісты ад кампаніяў «Беллегпраму», што займаюцца скураю («Бабруйскі скураны камбінат», «Гарадзенскае вытворчае скураное аб’яднанне», «Менскае вытворчае скураное аб’яднанне» і «Скінтэх»), пра тое, што яны не могуць паставіць аналагічны тавар у колькасці, цане і на ўмовах замежнага кантракту.


Дзея пастановы не распаўсюджваецца на скуру з Еўразійскага эканамічнага саюзу, што мае сертыфікат аб паходжанні тавару з краінаў ЕАЭС. Таксама пастанова не закранае транзіт праз Беларусь і замежнай бязвыплатнай дапамогі.


Чаму ўводзяць такое абмежаванне, не тлумачаць. Яго ўжо ўводзілі на паўгода ў 2021-м, але змеркавалі не працягваць.


У канцы мінулага года прадстаўнік «Беллегпраму» тлумачыў, што канцэрн прапанаваў вярнуць абмежаванне, бо спажыванне айчыннай скуры ў Беларусі нізкае, каля 43 % ад вырабленага, а абутковыя кампаніі «Белвест» і «Марка» толькі ў 30 % выпадкаў карыстаюцца беларускай скураю. Загрузка скураных заводаў складае толькі каля 85 %. Іншыя гульцы заклікалі «Беллегпрам» спачатку ацаніць наступствы забароны: лёгкая прамысловасць патрабуе скуры высокай якасці і модных колераў, а вытворцы скуры не заўсёды могуць тое прапанаваць.


Апошнім часам у Беларусі ўводзяць адваротныя абмежаванні – ліцэнзаванне экспарту – на гародніну.


Алесь Наваборскі belsat.eu

больш па гэтай тэме Глядзіце больш
Item 1 of 4
апошнія
Item 1 of 10