Атрымаўшы Telegram ID, можна вызначыць чалавека: даведацца спіс чатаў, пабачыць цяперашняе і папярэднія імёны ў акаўнце, а таксама нумар тэлефону, калі той не быў схаваны хоць у які момант.
Заснавальнік маніторынгавай групы «Беларускі Гаюн» Антон Матолька пацвердзіў «Медыязоне», што сярод звестак, якія ўцяклі з бота праекту, былі ўнікальныя ідэнтыфікатары карыстальнікаў мэсэнджару – Telegram ID.
Эксперты адзначаюць, што пад пагрозаю маглі апынуцца тыя, хто не дбаў пра ананімнасць Telegram-акаўнтаў. Сам па сабе Telegram ID не раскрывае імя, нумар тэлефону ці лакацыю карыстальніка. Але калі ведаць гэты ідэнтыфікатар, можна даведацца як мінімум пра спіс адкрытых чатаў, у якіх бярэ ўдзел карыстальнік, гісторыю перайменавання акаўнту, а таксама нумар тэлефону, да якога прывязаны акаўнт, калі гэты нумар хоць у які момант не быў схаваны.
«Кіберпартызаны» падкрэслівалі, што акаўнт можна зрабіць ананімным. Але пад пагрозаю тыя, хто пісаў з неананімнага акаўнту, або тыя, хто ў высланых «Гаюну» звестках пакінуў нейкую інфармацыю, што дазволіць дэананімізаваць карыстальніка. Перайменаванне ці выдаленне акаўнту ў такім выпадку не дапамогуць. «Кіберпартызаны» таксама заклікалі адміністратараў беларускіх тэлеграм-каналаў рабіць ананімных ботаў.
У выніку несанкцыянаванага ўваходу раніцай 5 лютага невядомыя атрымалі доступ да чату з ботам маніторынгавай групы «Беларускі Гаюн». Сілавікі хваліліся скрыншотамі перапісак, у тым ліку даволі свежых: ад 26 студзеня 2025 года. Фонд «BYSOL» заклікаў тых, хто непакоіцца праз узлом, звяртацца на гарачую лінію @help_bysol. Вядомае імя прынамсі аднаго затрыманага пасля выцеку звестак з бота «Беларускага Гаюна». За першы дзень пасля паведамлення пра ўзлом «BYSOL» атрымаў 50 зваротаў аб эвакуацыі з Беларусі.
«Беларускі Гаюн» спыніў працу 7 лютага. Матолька намякаў у X, што гэтага патрабаваў ГУБАЗіК у абмен на меншыя тэрміны для тых, каго асудзяць за сувязь з праектам. Два гады таму Матолька казаў, што ў бот пісалі 30 тысячаў чалавек.
Як казаў «Белсату» эксперт у лічбавай бяспецы Мікалай Кванталіяні, гэта не зусім узлом: імаверна, чалавек, які меў спасылку для падключэння да гэтага чату, быў затрыманы.
Паводле звестак «Нашай Нівы», на мінулым тыдні якраз затрымалі хлопца і дзяўчыну, якія працяглы час былі ў вышуку і хаваліся пад Менскам. Імаверна, праз тэлефон дзяўчыны сілавікі і атрымалі доступ да чату. Але выданне адзначае: сябры затрыманай кажуць, што ў перапісцы з Матолькам, якую паказалі сілавікі, стыль паведамленняў не адпавядае таму, як звычайна піша тая дзяўчына.
Прадстаўніца «Кіберпартызанаў» Юліяна Шаметавец казала «Белсату», што гэты і папярэднія ўзломы адбываюцца не праз звышпрасунутыя тэхнічныя магчымасці сілавікоў, а хутчэй праз памылкі і нядбайнасць тых, каго ўзламалі.
Алесь Наваборскі belsat.eu
