Супрацоўнікам Чырвонага Крыжа перадалі яшчэ трох ізраільцянаў, якіх тэрарысты «Хамасу» захапілі ў 2023 годзе. Ізраіль у замен выпусціў 183 палестынцаў.
Палестынская тэрарыстычная групоўка «Хамас» 8 лютага перадала супрацоўнікам Чырвонага Крыжа ў Газе трох ізраільскіх закладнікаў, піша «Reuters». Іхнае вызваленне транслявалі ў жывым эфіры, тэрарысты прымусілі закладнікаў зачытаць прапагандысцкія прамовы.
На волю выйшлі 34-гадовы Ор Леві, 56-гадовы Ахад Бэн Амі і 52-гадовы Элі Шарабі. Яны былі ў закладніках 491 дзень, цяпер яны на тэрыторыі Ізраілю. Тэрарысты захапілі іх у час нападу на Ізраіль 7 кастрычніка 2023 года. Тады тэрарысты забілі жонку і дзвюх юных дачок Шарабі, жонку Леві.
Сваякі вызваленых адзначаюць, што мужчыны выглядаюць знясіленымі, моцна схуднелымі, ледзьве ходзяць. Прэзідэнт Ізраілю Іцхак Гэрцаг напісаў у «X», што «так выглядае злачынства супраць чалавецтва».
Ізраіль у абмен на закладнікаў вызваліў і даставіў на Заходні бераг ракі Іярдан 183 палестынцаў. З іх 111 былі затрыманыя пасля атакі 7 кастрычніка 2023 года, 18 былі асуджаныя на пажыццёвае зняволенне за гэтую атаку, яшчэ 54 – асуджаныя на пажыццёвае зняволенне за іншыя дзеі.
Гэта ўжо пяты абмен між Ізраілем і тэрарыстамі пасля спынення агню, падпісанага 19 студзеня. Падчас атакі 7 кастрычніка 2023 года тэрарысты ўзялі ў закладнікі 251 чалавека, забілі 1180. З ліку закладнікаў да сённяшняга дня былі вызваленыя праз абмен 127, Ізраіль вызваліў жывымі яшчэ 8, атрымаў целы яшчэ 40. Ізраіль меркаваў, што на 7 лютага тэрарысты ўтрымлівалі жывымі 76 асобаў, у тым ліку 13 вайскоўцаў.
Алесь Наваборскі belsat.eu
