Марыю Калеснікаву ў калоніі вярнулі ў атрад да іншых жанчын. Пра гэта паведаміла ў Х ейная сястра Таццяна Хоміч.
«Мы даведаліся, што Марыя не ізаляваная ў калоніі і была вернутая ў атрад да іншых жанчын. Мы спадзяемся, што сувязь з Марыяй адновіцца. І хутка... мы дадамо наступны пункт у храналогію падзей за 4,5 года: Марыя вольная», – напісала Таццяна Хоміч.
Марыю трымалі ў ізаляцыі ў памяшканні камернага тыпу ў жаночай калоніі № 4 у Гомлі.
Апошнія звесткі пра Калеснікаву з’явіліся 12 лістапада 2024 года, калі яна сустрэлася ў калоніі з бацькам. Каб гэта адбылося, улады адправілі са сваяком Марыі Рамана Пратасевіча, якога ўлады Беларусі цяпер паказваюць як «праваабаронцу».
Да гэтага яна доўгі час была ўвогуле без сувязі з вонкавым светам, а сваякі не размаўлялі з палітзняволенай 18 месяцаў.
Марыя сустрэлася з бацькам на тэрыторыі шпіталю калоніі. Невядома, ці сустрэчу проста арганізавалі там, ці Марыя праходзіла лячэнне.
Раней палітзняволеная была шпіталізаваная праз перытаніт, які ўзнік ад прабадзення язвы.
Марыя несправядліва ўтрымліваецца ў няволі з 7 верасня 2020 года.
Арсен Рудэнка belsat.eu
