Як і ў мінулыя гады, самыя вялікія падаткі ў літоўскім ІТ за 2024 год заплацілі беларусы.
Хоць сёлета «EPAM Systems» ды «Wargaming» і заплацілі ў бюджэт Літвы на 4,4 млн еўраў меней падаткаў, чымся летась, гэта па-ранейшаму самыя вялікія падаткі ў літоўскім ІТ за 2024 год, паведамляе @devby.
Адна з магчымых прычынаў скарачэння падатковых паступленняў у бюджэт Літвы – адток беларускіх ІТ-спецыялістаў у іншыя краіны.
«EPAM Systems» за 2024 год пералічыла ў літоўскі бюджэт 17,8 млн еўраў падаткаў. Адлічэнні скараціліся на 14 % (на 2,8 млн еўраў).
Літоўская дачка «Wargaming» летась прынесла бюджэту Літвы 13,3 млн еўраў. У параўнанні з аналагічным перыядам мінулага года падатковыя адлічэнні скараціліся больш чым на 10 % (на 1,6 млн еўраў).
Нагадаем, адразу пасля пратэстаў 2020 года Літва актыўна прымала беларусаў, якія ўцякалі ад рэпрэсіяў на радзіме. Аднак цяпер колькасць грамадзянаў Беларусі з дазволам на жыхарства ў Літве змяншаецца, як вынікае са звестак літоўскага Дэпартаменту міграцыі.
Надзея Вольная belsat.eu
