У параўнанні з папярэднім тыднем колькасць украінцаў, якія заехалі на тэрыторыю Беларусі, павялічылася амаль на тысячу. Высвятляем чаму.
У перыяд з 31 студзеня да 7 лютага ў Беларусь прыехалі 5820 грамадзянаў Украіны. Паводле Дзяржаўнага памежнага камітэту, гэта амаль на тысячу чалавек болей, чым на тыдні да гэтага (былі 4964 асобы).
Агулам з 24 лютага 2022 года, то бок са дня, калі Расея распачала поўнамаштабную вайну супраць Украіны, у Беларусь прыехалі 311 316 грамадзянаў Украіны. З іх праз украінска-беларускую мяжу – 15 989 чалавек, транзітам праз Польшчу – 229 118, Літву – 59 348, Латвію – 6861.
Паводле інфармацыі Дзяржаўнага памежнага камітэту, за 2024 год у Беларусь прыехаў 134 561 грамадзянін Украіны. Наўпрост з тэрыторыі Украіны – 68 чалавек, транзітам праз Польшчу – 107 154 асобы, Літву – 25 362, Латвію – 1977.
«Дзяржпамежкамітэт Беларусі займаецца несумленнай падачай лічбаў і чыстай вады маніпуляцыяй», – заявіў у інтэрв’ю «Позірку» летась у лютым амбасадар МЗС Украіны ў асаблівых даручэннях у справе Беларусі Ігар Кізім. Паводле яго, гаворку трэба весці пра звычайныя паездкі грамадзянаў Украіны ў Беларусь.
Дыпламат адзначыў, што ў адкрытых крыніцах звестак пра колькасць украінцаў, якія выехалі з Беларусі, не знайсці.
«Сумленным і прыстойным з боку ДПК было б даваць гэтую статыстыку», – лічыць ён.
Нагадаем, нядаўна Ігар Кізім на сваёй старонцы ў «Фэйсбуку» пракаментаваў расследаванне «BELPOL» пад назваю «Зброевы барон», у якім раскрываецца праца беларускіх прадпрыемстваў на расейскі вайскова-прамысловы комплекс.
Кізім раіць усім паглядзець расследаванне, бо выкладзеныя ў ім факты «чарговы раз пацвярджаюць словы Лукашэнкі пра саўдзел рэжыму ў вайне і расейскай агрэсіі», а таксама дазваляюць зразумець крывадушнасць, з якой Лукашэнка гаворыць «пра сваю "міралюбнасць", а "простыя беларусы" дзякуюць яму за "мірнае і спакойнае развіццё Беларусі"».
Надзея Вольная belsat.eu
