Святлана Ціханоўская дамовілася з мэрам Тыраны аб стажыроўках спецыялістаў і адпачынку дзяцей палітвязняў.
5-6 лютага кіраўніца Аб’яднанага пераходнага кабінета (АПК) Святлана Ціханоўская была з візітам у Албаніі.
Як паведамляе тэлеграм-канал лідаркі дэмсілаў Беларусі, з Пактам свабодных гарадоў падчас гэтага візіту быў падпісаны мемарандум для падрыхтоўкі спецыялістаў мясцовага самакіравання.
Пакт свабодных гарадоў – гэта глабальная сетка, створаная ў 2019 годзе мэрамі сталіц, якая імкнецца абараняць і прасоўваць каштоўнасці свабоды, дэмакратыі і роўнасці.
Акрамя таго, разам з мэрам албанскай сталіцы Эр'ёнам Вэліяем Святлана Ціханоўская дамовіліся аб тым, што «10–20 беларусаў атрымаюць магчымасць прайсці стажыроўкі ў інстытуцыях мясцовага самакіравання і мэрыі Тыраны».
Ужо вядома, што 25 сакавіка ў Тыране пройдуць «адмысловыя мерапрыемствы на знак падтрымкі» беларусаў. А сёлета восенню беларускіх дакументалістаў запросяць да ўдзелу ў фестывалі правоў чалавека ў Албаніі.
«Вельмі ўдзячная Тыране за гасціннасць і салідарнасць. Дзеці палітвязняў атрымаюць магчымасць аздараўлення, маладыя спецыялісты – стажыровак, а студэнты – адукацыі. Албанія як краіна, якая пераадолела дыктатуру, разумее, наколькі важна мець шматбаковую падтрымку на шляху да свабоды і дэмакратыі», – адзначыла па выніках візіту Святлана Ціханоўская.
Надзея Вольная belsat.eu
