Пра тое, што колькасць зваротаў на гарачую лінію «BYSOL» рэзка вырасла, «Белсату» паведаміў кіраўнік фонду Андрэй Стрыжак. Ён адзначыў, што «ў вельмі складаных сітуацыях» людзям прапануюць эвакуацыю з Беларусі.
«Людзі звяртаюцца і пытаюць, што ім рабіць, калі яны пісалі ў чат-бот „Беларускага Гаюна“ ці іхныя сваякі. Такіх зваротаў было каля 50 за гэтыя содні», – сказаў Андрэй Стрыжак.
У параўнанні з звычайнымі днямі колькасць зваротаў істотна вырасла, давялося падцягваць рэзервы, каб усім адказаць:
,,«Калі мы бачылі, што сітуацыя ўжо рэальна вельмі складаная, то людзей перакіроўвалі да нашых спецыялістаў эвакуацыі, там ужо разам з імі прымаецца пастанова ў кожным індывідуальным выпадку, што рабіць: выходзіць чалавеку на эвакуацыйны трэк ці ён яшчэ можа застацца ў Беларусі».
Стрыжак адзначыў, што сілавікі паступова апрацуюць усю інфармацыю, выпампаваную з чату «Беларускага Гаюна», таму ўсе інфарматары праекту мусяць «пераглядзець захады бяспекі»:
«Пытанне падтрымання расейскай агрэсіі ва Украіне ключавое для Лукашэнкі, таму ён павінен справаздачыцца перад Крамлём пра тое, якім чынам ён супрацьдзеіць такім ініцыятывам, як „Беларускі Гаюн“. Усе, хто пісаў у „Беларускі Гаюн“, мусяць пераглядзець захады бяспекі і, улічваючы доступ да інфармацыі ў сілавікоў, маюць прымаць рашэнне, якім чынам далей дзеяць».
Стрыжак паабяцаў дапамагчы ўсім, хто звернецца на гарачую лінію @help_bysol.
Надоечы кіраўнік маніторынгавай групы «Беларускі Гаюн» Антон Матолька паведаміў пра несанкцыянаваны доступ да Telegram-чату, куды перасылалася ўся інфармацыя, якую карыстальнікі дасылалі з дапамогаю бота. Аказалася, што ў гэты чат можна было зайсці праз запрашальную спасылку. Імаверна, чалавека, які меў такую спасылку, затрымалі, і ў чат трапілі сілавікі.
Матолька ўзяў на сябе адказнасць за тое, што ў чат трапіла пабочная асоба, прызнаўшы, што гэта была ягоная памылка.
Кіберпартызаны адзначаюць: пад найбольшаю пагрозаю – асобы, якія пісалі «Гаюну» з неананімных акаўнтаў ці дасылалі інфармацыю, паводле якой асобу можна высветліць, гэта могуць быць дакладныя адрасы, галасавыя паведамленні, фота або відэа з тварам.
Таксама цяпер у небяспецы карыстальнікі, ў якіх Telegram-акаўнт зарэгістраваны на беларускі нумар, які не заўсёды быў схаваны. Тэлефонны нумар можна спраўдзіць праз «Telegram ID» – ідэнтыфікатар, што даецца акаўнту пры яго стварэнні. Ідэнтыфікатар не мяняецца, нават калі замяніць нумар тэлефона.
Сцяпан Кубік belsat.eu
