Праваабаронцы паведамляюць, што рэпрэсіі ў Беларусі не тое што не спыняюцца, а наадварот, разганяюцца яшчэ болей.
Праваабаронцы падрыхтавалі агляд сітуацыі з правамі чалавека ў Беларусі ў студзені 2025 года. За месяц, паводле «Вясны», зафіксаваныя 506 выпадкаў палітычна матываваных рэпрэсіяў.
Як паведамляецца, цягам студзеня было вынесена не меней за 175 палітычна матываваных прысудаў і 295 палітычна матываваных пастановаў у адміністратыўных справах.
Разам з тым адзначаецца, што дзейныя ўлады Беларусі і цяпер рыхтуюць «магчымасці для новых шырокамаштабных, у тым ліку трансмежных гранічных рэпрэсіяў». Для гэтага нават плануецца ўнесці чарговыя змены ў Крымінальны кодэкс.
Тым часам сілавікі ўзмацнілі кантроль і правяранне тых, хто выязджае з Беларусі.
Пра гэта паведаміў сузаснавальнік і кіраўнік дабрачыннага фонду «BYSOL», праваабаронца Андрэй Стрыжак. Дагэтуль звычайнай практыкай было паглыбленае правяранне на мяжы тых, хто вяртаецца ў Беларусь.
«Будзьце пільныя і падрыхтаваныя – трымайце дэвайсы чыстымі, галовы халоднымі і памятайце, што тэхніка бяспекі жыцця пры дыктатуры – гэта, у першую чаргу, ваша асабістая адказнасць», – піша Стрыжак.
Надзея Вольная belsat.eu
