У Гданьску 3–4 лютага праходзіць Форум Касцюшкі – падзея высокага ўзроўню, арганізаваная Міністэрствам замежных справаў Польшчы і прысвечаная сітуацыі ў Беларусі. У форуме ўдзельнічаюць прадстаўнікі ўладаў Украіны, Польшчы, Літвы і Швецыі, а таксама дэмакратычныя сілы Беларусі.
Намеснік кіраўніка МЗС Украіны Аляксандр Мішчанка падчас панэльнай дыскусіі адзначыў, што Кіеў не прызнае прэзідэнцкіх выбараў у Беларусі:
«У Беларусі прайшлі ганебныя выбары, на якіх прадказальна перамог [Аляксандр] Лукашэнка. Мы не прызнаем гэтых выбараў, якія прайшлі ва ўмовах поўнага адміністрацыйнага кантролю і палітычнага пераследу, адсутнасці рэальнай палітычнай канкурэнцыі, задушэння свабоды слова і ціску на незалежныя медыі. Мы бачым, што гэта план [Уладзіміра] Пуціна, які хоча, каб у Беларусі назаўжды ўстанавілася такая ж сітуацыя, як і ў Расеі».
Месца Беларусі ў Еўропе
Міністр замежных справаў Літвы Кястуціс Будрыс заявіў, што «месца Беларусі ў Еўропе, але, каб вярнуцца на еўрапейскі шлях, краіна павінна вызваліцца як ад абдымкаў дыктатара Лукашэнкі, так і ад расейскага ўплыву».
,,«Мы павінны дапамагчы дэмакратычным сілам Беларусі на гэтым шляху, бо дэмакратычная Беларусь важная для бяспекі як Літвы, так і ўсяго рэгіёну», – цытуе яго «Delfi».
Міністр таксама адзначыў, што важна працягваць падтрымліваць дэмакратычныя сілы Беларусі, спрыяць захаванню беларускай мовы і культуры, узмацняць ціск на рэжым Лукашэнкі і спрыяць больш цесным сувязям дэмакратычнай Беларусі з Еўропай.
У сваю чаргу міністарка Швецыі ў справах Еўразвязу Есіка Русэнкранц падкрэсліла, што сітуацыя ў Беларусі «сёння горшая, чым некалі». Тым не менш, на ейную думку, Беларусь у будучыні павінна быць часткай еўрапейскай сям’і, перадае DW.
«Ведаем, што сёння Беларусь не стане часткай ЕЗ. Але мы падтрымаем рэформы інстытуцый, рэформы эканомікі. Павінна быць ясная альтэрнатыва для сённяшняй Беларусі. Дзверы для ўступлення ў ЕЗ адкрытыя. Гэта відаць на прыкладзе Украіны і Малдовы. Самы галоўны пасыл для беларусаў – мы гатовыя зрабіць вас уключанымі ў еўрапейскую сям’ю», – сказала прадстаўніца Швецыі, паабяцаўшы працягваць падтрымліваць беларусаў.
Перамовы магчымыя, але з умовамі
У сваю чаргу беларуская дэмакратычныя лідарка Святлана Ціханоўская заклікала Еўразвяз працягнуць дапамогу беларускім ініцыятывам на фоне прыпынення амерыканскага падтрымання. «Дапамога Беларусі – гэта не дабрачыннасць, гэта інвестыцыя ў будучыню», – падкрэсліла Ціханоўская.
Яна таксама расказала, якім бачыць магчымы дыялог з уладамі Лукашэнкі: гэта павінен быць дыялог менавіта паміж уладамі і народам, а не ўладаў з іншымі краінамі. Для гэтага ў Беларусі мусяць спыніцца рэпрэсіі, падкрэсліла Ціханоўская.
,,«Нам спатрэбіцца пасярэдніцтва нашых еўрапейскіх партнёраў, амерыканскіх, кагосьці яшчэ. Але мы павінны прымусіць Лукашэнку пайсці на гэты круглы стол. А зрабіць гэта можна толькі шляхам ціску на рэжым і пры паслядоўным падтрыманні беларускага народу, беларускай нацыі», – сказала Ціханоўская.
Пакуль жа кіраўнік польскай дыпламатыі Радослаў Сікорскі ў каментары «Zerkalo» заявіў, што ў Варшавы з Менскам «няма ніякіх кантактаў на палітычным узроўні». Але, паводле Сікорскага, «беларускі бок добра ведае, што павінен зрабіць, каб гэтыя кантакты былі». Такім чынам ён пракаментаваў заяву кіраўніка беларускага МЗС Максіма Рыжанкова пра наяўнасць кантактаў і правядзенне перамоваў паміж краінамі.
Якуб Хруст belsat.eu
