За «злоўжыванне ўладай або службовымі паўнамоцтвамі» экс-кіраўнікоў баваўнянага аб'яднання ў Баранавічах збіраюцца прыцягнуць да крымінальнай адказнасці.
Стала вядома, што ў Баранавічах будуць судзіць былога гендырэктара баваўнянага абʼяднання (БВБА) Івана Турчака і ягоную намесніцу па эканоміцы Алену Пасюкевіч. На гэтую інфармацыю звярнуў увагу тэлеграм-канал «Віцебск, я гуляю».
За «злоўжыванне ўладай або службовымі паўнамоцтвамі» экс-кіраўнікоў прадпрыемства прыцягнулі да адказнасці паводле чч. 2 і 3 арт. 424 КК Беларусі. Ім пагражае ад трох да дзесяці гадоў пазбаўлення волі. Вядома, што першае судовае пасяджэнне адбудзецца 14 лютага ў судзе Баранавіцкага раёну і Баранавічаў.
Таксама, як стала вядома, на разглядзе ў судзе знаходзяцца два грамадзянскія пазовы да некалькіх топ-менеджараў БВБА – на кампенсацыю маёмаснай шкоды. Іх будуць разглядаць на пасяджэннях 6 і 7 лютага 2025 года.
Іван Турчак стаў гендырэктарам БВБА ў лютым 2012 года. Яго кандыдатуру на гэтую пасаду ўзгадняў асабіста Аляксандр Лукашэнка. Таксама Турчак быў дэпутатам Берасцейскага абласнога і Баранавіцкага гарадскога саветаў 27-га і 28-га скліканняў.
Як паведамляе «Зеркало», БВБА зʼяўляецца прадпрыемствам «зомбі»: для яго дзейнасці патрабуюцца пастаянныя фінансавыя ўліванні. У жніўні 2022 года стала вядома, што Агенцтву па кіраванні актывамі даручылі выкупіць даўгі БВБА – 26,45 млн рублёў і 13,26 млн долараў без уліку дысконту.
У лютым 2024 года стала вядома, што БВБА перайшло пад кіраванне Аршанскага ільнокамбіната. Узначаліла баранавіцкае прадпрыемства Наталля Ваўчэцкая, якая да гэтага пяць гадоў кіравала швейнай фабрыкай «Блакіт».
Надзея Вольная belsat.eu
