Развітанне з беларускай добраахвотніцай Марыяй Зайцавай, якая загінула, абараняючы Украіну, адбылося ў Кіеве 3 лютага, паведамляе радыё «Свабода» са спасылкай на сяброў Марыі.
Развітанне прайшло ў Кіеўскім крэматорыі.
Марыя Зайцава загінула 17 студзеня пад Пакроўскам. Напярэдадні, 16 студзеня, ёй споўнілася 24 гады.
Марыя вядомая беларусам яшчэ з пратэстаў 2020 года. Пасля выбараў 9 жніўня сілавікі жорстка разганялі пратэстоўцаў. Тады Марыя была параненая светлашумавой гранатай. Ёй зрабілі некалькі аперацыяў у Беларусі, а пасля яна паехала на лячэнне ў Чэхію.
Пасля пачатку поўнамаштабнага ўварвання Расеі ва Украіну дзяўчына выправілася на фронт. Спачатку была ў медчастцы, а потым стала снайперкай.
Пасля гібелі Марыі байцы 2-га Інтэрнацыянальнага Легіёну перадалі яе асабістыя рэчы ў музей «Вольная Беларусь з Украінай у сэрцы» ў Львове.
Арсен Рудэнка belsat.eu
