У папраўчай калоніі № 3 у Віцьбе учыніў суіцыд адзін з асуджаных, які адбываў пакаранне паводле наркатычнага артыкулу.
Як паведамляе «Гомельская Вясна», у канцы снежня 2024 года засіліўся асуджаны на 16 гадоў зняволення 50-гадовы грамадзян Расеі. На начным правяранні яго не далічыліся кантралёры, пачалі шукаць і знайшлі мёртвым у летняй сушылцы для бялізны лакальнага ўчастку.
Асуджанаму вязню нядаўна адмовілі ў пераводзе ў Расею для адбыцця пакарання, хоць раней гэта даволі часта практыкавалася. Праваабаронцы тлумачаць, што ў Расеі асуджаныя паводле такога артыкулу маюць права на датэрміновае вызваленне і іншыя палёгкі.
Былыя зняволеныя ПК № 3 «Віцьба» расказалі праваабаронцам, што толькі за 2024 год у калоніі праз адсутнасць належнай дыягностыкі захворванняў і лячэння памерлі не менш за тры вязні.
31 кастрычніка 2024 года сталася вядома пра смерць у калоніі № 15 у Магілёве ад «механічнай асфіксіі» яшчэ аднаго грамадзяніна Расеі – палітвязня Дзмітрыя Шлетгаўэра. Праўда, ягоная сям’я заяўляе, што Дзмітрый не планаваў самагубства, іншыя абставіны трагедыі невядомыя.
Якуб Хруст belsat.eu
