Камандаванне ўзброеных сілаў Польшчы паведаміла пра суіцыд жаўнера ў раёне, дзе трывае аперацыя «Бяспечнае Падляшша». Яе галоўная мэта – дапамагчы памежнікам і паліцыянтам ахоўваць мяжу ад нерэгулярных мігрантаў.
«З глыбокім жалем паведамляем, што сёння ўначы ў раёне правядзення аперацыі „Бяспечнае Падляшша“ адбылося самагубства жаўнера», – такі допіс з'явіўся ў акаўнце камандавання ўзброеных сілаў Польшчы ў сацсетцы X.com.
Акалічнасці здарэння цяпер высвятляе вайсковая паліцыя пад наглядам пракуратуры. Аніякай інфармацыі пра асобу службоўцы не даецца.
«Сям'і і сваякам загінулага жаўнера надаецца псіхалагічная дапамога», – адзначаецца ў паведамленні.
Аперацыя «Бяспечнае Падляшша» распачалася ў леташнім жніўні з мэтаю ўмацаваць бяспеку на мяжы з Беларуссю. Вайскоўцы дапамагаюць памежнікам і паліцыянтам змагацца з нерэгулярнаю міграцыяй, якой, як сцвярджаюць у Польшчы, спрыяюць улады Беларусі.
У вайсковай аперацыі задзеяныя каля 17 тысяч жаўнераў. Выданне «Wprost» падкрэслівае, што вайскоўцы нясуць там службу «ў цяжкіх умовах, часта зазнаюць стрэс ды іншыя выклікі, звязаным з аховаю дзяржаўнай мяжы».
Паводле Памежнай аховы Польшчы, толькі з 28 да 30 студзеня службоўцы перадухілілі 70 спробаў парушыць польска-беларускую мяжу.
Сцяпан Кубік belsat.eu
