1 лютага ў ваколіцах Беластоку адбыўся KALINOŬSKI MARŠ 2025, прымеркаваны да дню народзінаў Кастуся Каліноўскага. Удзельнікі мерапрыемства таксама ўшанавалі памяць іншых герояў паўстання 1863 – 1864 гадоў, піша «Радыё Свабода».
Марш зладзіла арганізацыя «Рух» з партнёрскім удзелам Беларускай дыяспары Беластоку, клубу гістарычнай рэканструкцыі «Invictus 1863», Беластоцкай Харугвы і «Беларускага дому».
Мерапрыемства пачалося ў мястэчку Гарадок, дзе некалі штогод ладзілася «Басовішча», а цяпер – фестываль «Тутака». З мясцовай вуліцы Кастуся Каліноўскага ўдзельнікі пайшлі пешым маршам у бок вёскі Страшава.
У Страшаве ўшанавалі памяць вядомага беларускага пісьменніка і грамадзкага дзеяча Аляксея Карпюка, які нарадзіўся ў гэтай вёсцы, а ў час ІІ Сусветнай вайны кіраваў партызанскім атрадам ім. Кастуся Каліноўскага.
Таксама актывісты ўшанавалі памяць выбітнага беларускага вайсковага і грамадска-палітычнага дзеяча Міколы Дзямідава, які нарадзіўся ў суседнім Гарадку і быў сваяком Кастуся Каліноўскага. Каля прыдарожнай капліцы былі ўскладзеныя выявы дзеячоў разам са знічамі.
Да вёскі Мастаўляны, дзе 2 лютага 1838 года і нарадзіўся Кастусь Каліноўскі, актывісты зладзілі аўтапрабег.
Разам з пешым маршам агульная адлегласць склала 26 кіламетраў – менавіта столькі гадоў пражыў нацыянальны герой.
У Мастаўлянах прайшла ўрачыстая частка мерапрыемства. Яе адкрыў Васіль Калач і іншыя прадстаўнікі клубу «Invictus 1863», якія сталі на ганаровай варце каля помніка, апранутыя ў паўстанцкія мундуры.
Праграму працягнула Кацярына Ваданосава, якая прачытала ўласны верш, прысьвечаны паўстанню – «Касінэрскі баль».
Марыя Міхалевіч belsat.eu
