Яшчэ ў лістападзе 2024 года іміграцыйная і мытная службы ЗША склалі дэпартацыйны спіс, у ім значацца 323 грамадзяніны Беларусі.
Пасля ўступлення на прэзідэнцкую пасаду Доналда Трампа барацьба з нелегальнаю міграцыяй у ЗША актывізавалася. Новая адміністрацыя ўжо арганізуе дэпартацыйныя авіярэйсы з прымусоваю дастаўкаю мігрантаў на радзіму. Аднак трэба зазначыць, што дзейны дэпартацыйны спіс быў складзены пры адміністрацыі 46-га прэзідэнта ЗША Джо Байдэна.
Паведамляюць, што ў гэты спіс залучаныя грамадзяне 205 дзяржаваў (усяго 1 445 549 асобаў), у тым ліку тыя, што спынілі сваё існаванне, напрыклад, Сербія і Чарнагорыя (64 чалавекі), СССР (337), Чэхаславаччына (254) і Югаславія (845).
Не выключана, што сярод трымальнікаў савецкіх пашпартоў таксама ёсць беларусы. Але пакуль вядома толькі пра 323 беларусаў, якіх найбліжэйшым часам хочуць дэпартаваць з ЗША.
Нагадаем, што першыя ўказы Трампа на прэзідэнцкай пасадзе сталіся скандальнымі. Сярод іх і памілаванне нападнікаў на Капітолій, і выхад з Парыжскага пагаднення, і расчышчэнне шляху для бурэння нафты ў Арктыцы, і шмат чаго яшчэ. Усе яны былі апублікаваныя на сайце Белага дому.
Пры гэтым вайна ва Украіне трывае, хоць Трамп і абяцаў скончыць яе за 1 дзень, калі зноў станецца прэзідэнтам.
Надзея Вольная belsat.eu
