Агучаныя дакладныя лічбы новага ўтылізацыйнага збору на аўтамабілі. І яны сумныя.
Нагадаем: урад Беларусі пастанавіў выраўняць стаўкі ўтылізацыйнага збору з тымі, што дзеяць у Расеі. Было анансавана, што для аўтадылераў у параўнанні з цяперашнімі тарыфамі яны павялічацца ўдвая, а на электракары – ажно ў 42 разы. Суму гэтага збору залучаюць у кошт машыны.
Адпаведную пастанову падпісаў прэм'ер-міністр Раман Галоўчанка. Аднак пры гэтым ніхто не паведаміў, што шмат каму і ў якіх выпадках давядзецца плаціць яшчэ болей. Паводле чыноўнікаў, яны проста «пералічылі» стаўкі.
І вось з’явіліся дакладныя лічбы. Як высветлілася, стаўкі ўтылізацыйнага збору будуць зафіксаваныя ў беларускіх рублях.
Найперш, новыя стаўкі паўплываюць на кошт новых машынаў у дылераў. Для легкавікоў, маладзейшых за тры гады з аб'ёмам рухавіка да 1 літра, збор павялічыцца з Br 3145 (каля $ 930) да Br 6356 ($ 1870).
Для машынаў з аб'ёмам рухавіка ад 1 да 2 літраў (самы распаўсюджаны варыянт) збор вырасце з Br 11 645 (каля $ 3400) да Br 23 575 (амаль $ 7000).
Для легкавікоў з аб'ёмам рухавіка ад 2 да 3 літраў збор павялічыцца з Br 32 727 (каля $ 9600) да Br 66 248 (каля $ 19 500).
І гэта значыць, што, паводле грубых падлікаў, стаўкі на новыя аўты з рухавікамі ўнутранага згарання выраслі ўдвая.
Ёсць змены і для электрамабіляў: па старых стаўках юрыдычныя асобы пры ўвозе плацілі за іх Br 544, то цяпер будуць аддаваць Br 1148. І тут таксама атрымліваецца двухразовы рост.
Затое змены не закрануць коштаў айчынных «BelGee», бо машыны беларускай вытворчасці не абкладаюцца ўтылізацыйным зборам.
Надзея Вольная belsat.eu
