Агенцтва вышуку і менеджменту актываў (АВМА) Украіны паведаміла пра паспяховую рэалізацыю чарговай партыі беларускага калію аб’ёмам 2357 тонаў.
Адзначаецца, што прададзены калій заставаўся ў 34 чыгуначных вагонах. Выручаная сума склала 25,321 млн грыўняў (каля 607,7 тыс. долараў). Усяго, як заяўляецца, у студзені зрэалізавалі хларыду калію на суму 112,6 млн грыўняў (2,7 млн долараў).
Нагадаем, што ў 2022 годзе Генпракуратура Украіны паведаміла пра арышт 33 тонаў мінеральных угнаенняў, якія належаць прадпрыемствам з Расеі і Беларусі.
На сайце Офісу генпракурора гаварылася, што арыштаваныя чыгуначныя вагоны былі ўвезеныя на тэрыторыю Украіны з парушэннямі мытнага заканадаўства. Была распачатая крымінальная справа за ўхіленне ад сплаты падаткаў у асабліва буйным памеры (ч.3 арт. 212 КК Украіны).
«Паводле следства, чыгуначныя кантэйнеры з угнаеннямі прыбылі ва Украіну яшчэ да пачатку поўнамаштабнага ўварвання [24 лютага 2022 года]. Яны заставаліся ў рэжыме «транзіт» у Мікалаеве на тэрыторыі марскога спецыялізаванага порту», – гаварылася ў заяве ўкраінскага нагляднага ведамства. Арыштаваную маёмасць перадалі ў АВМА.
Ёсць інфармацыя, што беларускі і расейскі калій перавозіўся ў трэція краіны для продажу і атрымання мільённых прыбыткаў, пры гэтым частка выручкі ў выглядзе падаткаў пайшла б на фінансаванне вайны РФ супраць Украіны.
Надзея Вольная belsat.eu
