Прэзідэнт Турцыі Рэджэп Таіп Эрдаган павіншаваў Аляксандра Лукашэнку з «перамогаю на выбарах», паведаміла 30 студзеня прэс-служба кіраўніка Беларусі.
Эрдаган пажадаў Лукашэнку «далейшых поспехаў на высокай пасадзе».
,,«Я перакананы, што супраца, якая існуе паміж нашымі краінамі, у палітычнай, эканамічнай і гуманітарнай сферах у будучым перыядзе яшчэ больш узмацніцца дзякуючы нашым супольным высілкам. Карыстаючыся выпадкам, ізноў выказваю вашай дастойнасці зычэнні здароўя і шчасця, а сяброўскаму беларускаму народу – росквіту і дабрабыту», – перадаў свае віншаванні прэзідэнт Турцыі.
Таксама 30 студзеня Лукашэнку павіншавалі кароль Бахрэйну шэйх Хамад бін-Іса аль-Халіфа і спадчынны прынц, прэм’ер-міністр гэтай краіны Сальман бін-Хамад аль-Халіфа.
Кароль Бахрэйну падзякаваў Лукашэнку за двухбаковыя дачыненні паміж Каралеўствам і Беларуссю і выказаў намер умацоўваць супрацу.
Раней Лукашэнку павіншавалі лідары Азербайджану, Казахстану, Кыргызстану, Расеі, Таджыкістану, Туркменістану, Узбекістану, В’етнаму, Кітаю, М’янмы і Пакістану.
З Еўропы прыйшло два віншаванні – ад прэзідэнта Сербіі і старшыні Босніі і Герцагавіны. Таксама Лукашэнку павіншавалі кіраўнікі Венесуэлы, Кубы і Нікарагуа. З лідараў Афрыкі і Акіяніі ніхто яму віншаванняў не дасылаў.
Марыя Міхалевіч belsat.eu
