У Браварах пад Кіевам 28 студзеня развіталіся з вайскоўцам беларускага паходжання Аляксандрам Новікам, які загінуў у баях у Луганскай вобласці.
Як паведамляе brovary.news, жаўнер Аляксандр Новік служыў снайперам дэсантна-штурмавога аддзялення дэсантна-штурмавога батальёна. Ён загінуў 20 студзеня пры выкананні баявога задання ў раёне вёскі Новаягораўка Сватаўскага раёну Луганскай вобласці.
Развітанне з ім адбылося на Майдане Свабоды ў Браварах, паніхіда прайшла ў праваслаўнай царкве Пакрова Прасвятой Багародзіцы. Пахавалі загінулага на Алеі Славы ў Браварах.
Выданне «Медиазона» адзначае, што Аляксандр Новік быў беларусам.
17 студзеня сталася вядома, што ва Украіне загінула беларуска Марыя Зайцава, якая была параненая на пратэстах у Менску 9 жніўня 2020 года. Пасля поўнамаштабнай агрэсіі Расеі супраць Украіны яна служыла медыкам у складзе 2-га Інтэрнацыянальнага легіёна на баку Украіны. А пасля таксама стала снайперам.
Якуб Хруст belsat.eu
