Ізраіль заяўляе, што васьмёра з рэшты 26 закладнікаў, якіх абяцаў вызваліць «Хамас» падчас першай фазы пагаднення аб спыненні агню ў сектары Газа, мёртвыя.
«Спіс ад «Хамасу» адпавядае выведным звесткам Ізраілю, таму я магу падзяліцца з вамі, што... васьмёра былі забітыя «Хамасам», – сказаў прадстаўнік ураду Давід Мэнсэр, паведамляе Бі-Бі-Сі. – Сем'і былі паінфармаваныя аб становішчы іх сваякоў».
Імёны забітых не называюцца. З пачатку спынення агню 19 студзеня «Хамас» вызваліў сем ізраільскіх жанчын у абмен на больш за 290 палестынскіх зняволеных, якія ўтрымліваліся ў ізраільскіх турмах. На гэтым тыдні чакаецца вызваленне яшчэ шасці.
Самая доўгая арабска-ізраільская вайна, падобна, завяршылася перамір’ем, якое набыло моц 19 студзеня. Хоць сам канфлікт не вычарпаны і перспектываў яго развязання таксама не відаць. Тым не менш ён ужо моцна паўплываў на сітуацыю ў свеце, а дасягнутае перамір’е, магчыма, паказвае, як будуць спрабаваць памірыць Расею з Украінаю.
Падчас першага этапу перамір’я «Хамас» мусіць вызваліць 33 закладнікаў, жывых і мёртвых: жанчын, дзяцей, асобаў сталага веку, хворых і параненых цывільных. У пагадненні падкрэсліваецца, што мэта ўгоды – вызваліць усіх ізраільскіх закладнікаў, як жывых, так і загінулых, прычым не толькі тых, каго захапілі ў «чорную суботу» 7 кастрычніка 2023 года, а і «затрыманыз ува ўсе перыяды».
У адказ плануецца вызваліць з ізраільскіх турмаў 1904 палестынцаў. Сярод іх значная частка адбывае пажыццёвае зняволенне за забойствы або дапамогу забойству. Гэта прадстаўнікі «Хамасу», «Фатху», «Ісламскага джыхаду» ды іншых груповак.
Якуб Хруст belsat.eu
