Канада ўвяла санкцыі супраць жонкі Аляксандра Лукашэнкі, сем’яў Балабы і Карпянкова

Канада ўвяла санкцыі «ў сувязі з працяглымі грубымі і сістэматычнымі парушэннямі правоў чалавека рэжымам Лукашэнкі ў Беларусі, а таксама за падтрыманне Расеяй парушэння суверэнітэту і тэрытарыяльнай цэласнасці Украіны».

Тым, хто трапіў у санкцыйны спіс, Канада замарожвае актывы ў сваіх межах. Канадцы за межамі сваёй краіны таксама не могуць ажыццяўляць аперацыі з любой маёмасцю падсанкцыйных асобаў і кампаніяў, ажыццяўляць аперацыі з любой іхнай маёмасцю. Людзям з санкцыйнага спісу забараняецца ўезд у Канаду.

Акрамя Галіны Лукашэнкі пад санкцыі трапілі:

– удзельніца праўладных аўтапрабегаў, і, згодна са злівамі тэлефонных размоваў ад «Кіберпартызанаў», блізкая да камандзіра менскага АМАПу Дзмітрыя Балабы асоба Вольга Маршаловіч;

– камандзір 2-га ўзводу АМАПу Менгарвыканкаму, сын Дзмітрыя Балабы Арцём Балаба;

– сын Дзмітрыя Балабы Максім Балаба;

– супрацоўнік 5-га ўпраўлення ГУБАЗіКу, сын намесніка міністра ўнутраных справаў Беларусі – камандуючага ўнутранымі войскамі Мікалая Карпянкова Ігар Карпянкоў;

– жонка Мікалая Карпянкова Ірына Карпянкова;

– дырэктар ААТ «Завод «Легмаш» Уладзіслаў Паўленка;

– дырэктар кампаніі «Беспілотныя верталёты» Уладзімір Чудакоў;

– дырэктар ААТ «Станкагомель» Анатоль Савянок;

– начальнік ГУБАЗіКу Андрэй Ананенка.

Кампаніі і арганізацыі, якія трапілі пад санкцыі:

– АМАП;

– ГУБАЗіК;

– Камітэт дзяржаўнай бяспекі Беларусі;

– «Станкагомель»;

– «Беларускі металургічны завод»;

– «Легмаш»;

– канструктарскае бюро «Беспілотныя верталёты»;

– ТАА «Лабараторыя адытыўных тэхналогіяў»;

– «Рухсерваматар»;

– «Менскі падшыпнікавы завод»;

– «Менскі завод шасцерняў»;

– «Вістан».

Арсен Рудэнка belsat.eu