Сілавікі ўстанавілі асобы 365 удзельнікаў замежных акцыяў падчас выбараў 26 студзеня, сцвярджае Следчы камітэт. Людзям пагражаюць, што адбяруць маёмасць у іх і іхных блізкіх.
На думку Следчага камітэту, людзі за мяжой выйшлі на акцыі ў дзень выбараў, каб дыскрэдытаваць Беларусь і сарваць выбары. Падчас сходаў нібыта распальвалася сацыяльная варожасць і выкарыстоўвалася экстрэмісцкая сімволіка.
«Нягледзячы на павышаныя меры канспірацыі з агульнай колькасці ўдзельнікаў (581 чалавек) ідэнтыфікаваныя 365 персанажаў, якія ўзялі ўдзел у зборышчах у розных гарадах. Сярод іх: Вроцлаў – 11, Варшава – 203, Беласток – 18, Вільня – 29, Нью-Ёрк – 39, Прага – 11 і іншыя», – кажа начальнік аддзелу інфармацыі і сувязі з грамадскасцю цэнтральнага апарату Следчага камітэту Сяргей Кабаковіч.
На тых, каго сілавікі заўважылі, абяцаюць завесці крымінальныя справы і адабраць маёмасць.
«Правяраецца наяўнасць у іх маёмасці і нерухомасці на тэрыторыі Беларусі, у тым ліку зарэгістраванай на іншых асобвў», – кажа Кабаковіч.
Раней Аляксандр Лукашэнка пагражаў тым, хто збіраецца выйсці на акцыі за мяжой, і адзначаў, што ў Беларусі жывуць іхныя сваякі і блізкія.
«Вы проста падставіце гэтых людзей», – сказаў ён.
А актывісту Іллю Дабратвору спецслужбы прапаноўвалі грошы за фота з акцыяў у Варшаве. Дабратвор падзяліўся скрыншотамі перапіскі пра гэта ў сацыяльных сетках.
Арсен Рудэнка belsat.eu
