Вялікая Брытанія 27 студзеня дадала ў санкцыйны спіс у дачыненні Беларусі яшчэ дзевяць пазіцыяў. Туды трапілі кампаніі, сілавікі і кіраўнік ЦВК.
Вялікая Брытанія замарожвае актывы кампаніяў, якія трапілі пад санкцыі, калі гэтыя актывы ёсць у Вялікай Брытаніі. Для людзей са спісу ўведзеная забарона на ўезд і таксама замарожванне актываў.
З кампаніяў пад санкцыямі апынуліся ААТ «АЛЕВКУРП», КБ «Беспілотныя верталёты» і ААТ «Завод "Легмаш"» за тое, што прадпрыемствы «атрымліваюць або атрымлівалі выгаду ад ураду Беларусі або надаюць яму падтрыманне, ажыццяўляючы дзейнасць у сектары, які мае стратэгічнае значэнне», а менавіта ў абаронным сектары.
Персанальна ў спісе апынуліся кіраўнік ГУБАЗіК Андрэй Ананенка, намеснік кіраўніка ГУБАЗіК Міхаіл Бедункевіч, начальнік менскага СІЗА № 1 Андрэй Цэдрык, старшыня Цэнтральнай выбарчай камісіі Ігар Карпенка, начальнік турмы № 1 у Горадні Павел Казакоў, начальнік калоніі № 11 у Ваўкавыску Віктар Дуброўка.
Усе яны трапілі пад санкцыі таму, што нясуць адказнасць за здзяйсненне сур'ёзных парушэнняў правоў чалавека ў Беларусі, удзельнічаюць у іх, падтрымліваюць іх і спрыяюць ім; за падаўленне грамадзянскай супольнасці і дэмакратычнай апазіцыі; за дзеянні і дзейнасць, якія падрываюць дэмакратыю і вяршэнства закону ў Беларусі.
Арсен Рудэнка belsat.eu
