Ананімы здолелі размясціць на сайце «BELPOL» банер у падтрыманне Лукашэнкі. Сайт ужо аднавіў нармальную працу, а арганізацыя заяўляе, што важных звестак з сайту не маглі здабыць.
Днём 26 студзеня ананімныя Telegram-каналы, звязаныя з беларускімі сілавікамі, заявілі пра ўзлом сайту беларускай арганізацыі «BELPOL». Сайт арганізацыі, мяркуючы з «ўэб-архіву», сапраўды ў нейкі момант быў узламаны, на ім быў размешчаны банер у падтрыманне Аляксандра Лукашэнкі. З паведамленняў праўладных каналаў выглядае, што хакеры атрымалі доступ да сістэмы публікацыі кантэнту на сайце (CMS). На момант публікацыі сайт Belpol.pro працуе ў звычайным рэжыме.
Абвестку пра ўзлом размясцілі першапачаткова на расейскім форуме «Cyberforum.ru». На момант публікацыі абвестка выдаленая. На скрыншотах, што распаўсюджваюць у Telegram, у гэтай абвестцы гаворыцца, што хакеры «скралі базу» ўдзельнікаў «BELPOL» і неўзабаве яе апублікуюць.
«BELPOL» пацвердзіў «Белсату», што іх сайт быў узламаны:
«Цягам некалькіх месяцаў нашыя рэсурсы, у тым ліку навінавы сайт, атакавалі ў сярэднім за дзень каля 200-220 мільёнаў разоў. Менавіта сайт зазнаў гэтую нагрузку, напады ідуць і ў цяперашні час. У выніку абарона не справілася і сайт быў пашкоджаны».
,,«Праз тое што сайт навінавы, ніякай крытычнай інфармацыі, акрамя той, што была апублікаваная, на ім не было. Заявы прыхільнікаў рэжыму дыктатара пустыя».
«BELPOL» падкрэслівае, што на сайце «паказвае і дае пабачыць толькі тое, што жадае паказаць», і што пра тых, хто атакаваў сайт, «ведае куды больш, чым яны пра нас». Арганізацыя адзначае, што для жыхароў Беларусі доступ на сайт яшчэ раней быў закрыты для наведвання без VPN дзеля бяспекі карыстальнікаў.
На думку арганізацыі, узлом – гэта «індыкатар, які выразна паказвае, хто сапраўды пагражае рэжыму».
Алесь Наваборскі belsat.eu
