У дзень выбараў улады ўсімі сіламі спрабуюць стварыць атмасферу свята, бо фактычна нічым іншым завабіць на ўчасткі больш не могуць. Выбіраць падчас галасавання беларусы могуць хіба паміж відамі беляшоў, якія прадаюцца ў буфетах на выбарчых участкаў, але не паміж кандыдатамі.
Мы сабралі для вас самыя цікавыя моманты, звязаныя з днём «пераабрання» Аляксандра Лукашэнкі на сёмы тэрмін.
Быў 245-ы, стаў першы
Участку, на якім традыцыйна галасуе Аляксандр Лукашэнка, пастанавілі надаць першы нумар. Як вядома, Лукашэнка заўсёды прыязджае галасаваць у Беларускі дзяржаўны ўніверсітэт фізкультуры. Прапагандыст Ігар Тур адзначыў, што раней гэты ўчастак меў іншы нумар, а сёлета, паколькі «ў народзе гэты ўчастак называюць першым» (нагадаем, што «першым» таксама называе Лукашэнку і прапаганда), участку пастанавілі таксама надаць нумар 1 у Цэнтральным раёне Менску. Невялікі штрышок у стварэнні культу асобы ў дзяржаве.
Даеш масы!
Розныя ўстановы Беларусі відавочна атрымалі разнарадку стварыць карцінку масавага галасавання. Асабліва ганебна глядзяцца фотаздымкі з розных медычных установаў: пачынаючы ад хірургічных аддзяленняў і заканчваючы радзільнямі.
Show must go on
Міністэрства культуры паклапацілася пра арганізацыю выступаў артыстаў па ўсёй краіне. Часам яны выступаюць у вельмі нечаканых месцах.
«Крынжалёт»
«Вось такога незвычайнага выбарца прыкмецілі побач з участкам пад Менскам», – піша адзін з прапагандысцкіх каналаў. Праўда, прыгледзеўшыся да ландшафту, можна заўважыць, што выбарчы ўчастак з-пад Менску перамясціўся няйначай у Татры або Карпаты.
Пераняць найлепшыя рысы лукашэнкаўскай выбарчай сістэмы
Пра гэта заявілі назіральнікі з Зімбабвэ, якія прыехалі ў Беларусь. Акрамя таго, яны адзначылі падабенства ў выбарчым заканадаўстве Беларусі і сваёй краіны.
«Напрыклад, у Зімбабвэ таксама нельга галасаваць за мяжой», – паведамілі назіральнікі.
Трэба зазначыць, што практыку Аляксандра Лукашэнкі ягоны сябар Эмэрсан Мнангагўа пераймае сапраўды вельмі актыўна: падчас апошніх выбараў у 2023 годзе ў краіне былі зафіксаваныя сур’ёзныя парушэнні, а апазіцыя дасюль аспрэчвае вынікі той кампаніі.
Галасаваў за ўсіх
Аляксандр Лукашэнка падчас галасавання сам адказаў на пытанне, якога яму ніхто не задаваў: за каго ён аддаў свой голас.
«Калі вы хочаце спытаць за каго, мушу вам шчыра прызнацца – за ўсіх!» – адказаў Аляксандр Лукашэнка.
З ягонага адказу вынікае, што ён сапсаваў свой бюлетэнь. Бо, нагадаем, у бюлетэнях ёсць імёны пяці кандыдатаў (Аляксандр Лукашэнка і чатыры кандыдаты, якіх часта называюць «спойлерамі»), а таксама графа «Супраць усіх». Опцыі прагаласаваць за ўсіх не прадугледжана. Калі паставіць адзнаку ва ўсіх ячэйках, то бюлетэнь будзе лічыцца несапраўдным.
Умка
Аляксандр Лукашэнка прыбыў на выбарчы ўчастак разам з сабачкам Умкам, хаця ў ранейшыя электаральныя кампаніі прыязджаў галасаваць разам з сынам Колем.
Пакуль гаспадар быў заняты пазаваннем на камеры, Умка не губляў часу і «памеціў» выбарчы ўчастак.
Раман Шавель belsat.eu
