Спробы афіцыйнага Менску атрымаць легітымнасць праваліліся, заявіла лідарка дэмсілаў Святлана Ціханоўская. Дэмакратычныя сілы працягнуць сваю працу, дадала яна на брыфінгу ў Варшаве 26 студзеня, паведамляе «REFORM.news».
«Усе спробы легітымізаваць рэжым Лукашэнкі праваліліся. Упершыню дэмакратычныя краіны і міжнародныя арганізацыі не прызналі нявыбары яшчэ да іх правядзення», – сказала Святлана Ціханоўская.
Яна падкрэсліла, што дэмакратычныя сілы, у тым ліку Аб'яднаны пераходны кабінет і Каардынацыйная рада, працягнуць падтрымліваць беларусаў і працаваць з замежнымі партнёрамі.
«Дэмакратычныя сілы Беларусі, Аб'яднаны пераходны кабінет і Каардынацыйная рада працягнуць падтрымліваць беларусаў, прадстаўляць іх інтарэсы і адстойваць нашую дзяржаўнасць. Мы будзем захоўваць адзінства, а таксама каардынаваць нашую дзейнасць з нашымі замежнымі партнёрамі. Я веру, што мы абавязкова разам даможамся таго, каб Беларусь стала незалежнай і дэмакратычнай краінай, таму што беларусы годныя лепшага. Жыве Беларусь!» – сказала Ціханоўская.
Арсен Рудэнка belsat.eu
