У дзень, калі ў Беларусі ладзіцца імітацыя выбараў, прадстаўнікі палка Каліноўскага, якія змагаюцца са зброяй у руках ва Украіне з расейскімі акупантамі, расказалі пра выбар, які зрабілі яны і які мусяць у хуткім часе зрабіць усе беларусы.
У заяве, апублікаванай на сайце палка Каліноўскага, гаворыцца, што прайшло амаль пяць гадоў з падзеяў 2020 года, за якія змянілася ўсё.
«Часта кажуць, што ў беларусаў няма выбару. Гэта няпраўда. Выбар ёсць заўсёды. Мы, беларускія добраахвотнікі палка імя Кастуся Каліноўскага, зрабілі свой выбар. Мы ўзялі ў рукі зброю. І кожны знішчаны акупант, кожны бой – гэта наш крок да свабоды», – гаворыцца ў заяве.
Каліноўцы адзначаюць, што змагаюцца за сваё простае права на жыццё і свабоду, бо вайна ва Украіне – «не нейкі далёкі канфлікт, а пагроза, якая ўжо стаіць на парозе нашай хаты». Адседзецца не атрымаецца, бо глабальны канфлікт не абміне нікога.
На нас рухаецца зло, якое прыносіць смерць, гвалт і знішчэнне. Былога спакойнага жыцця больш няма, як няма гарантыяў і бяспечных месцаў. А абмеркаванне вайны ў Еўропе цяпер вядзецца адкрыта, адзначаецца ў звароце.
«Калі вы думаеце, што ваша хата з краю, то хутка з’явяцца тыя, каму яна патрэбная больш, чым вам. У нас цяпер ёсць выбар, але выбар цяжкі: біцца ці бегчы. Пытанне толькі адно: які выбар твой?» – звяртаюцца каліноўцы да беларусаў.
Час словаў скончыўся, гаворыцца ў заяве, і настаў час дзеянняў – час зрабіць свой выбар.
Раман Шавель belsat.eu
