На волю выйшаў палітвязень Часлаў Канановіч. Ён правёў за кратамі паўтара года з прызначаных пяці. Відэа з Чаславам і ягонай жонкаю Настассяй апублікаваў прапагандыст Ігар Тур.
У снежні 2023 года суддзя Менскага абласнога суда Вячаслаў Тулейка прызначыў Чаславу Канановічу 5 гадоў калоніі ўзмоцненага рэжыму паводле абвінавачання ў «фінансаванні дзейнасці для ўдзелу на тэрыторыі замежнай дзяржавы ва ўзброеным фармаванні».
Следства сцвярджала, што мужчына зрабіў 10 данатаў на 1200 рублёў палку Каліноўскага.
Праваабаронцы прызналі Канановіча палітвязнем. Ён сядзеў у магілёўскай калоніі.
Сёння прапагандыст Ігар Тур апублікаваў відэа, запісанае сужэнцамі – Чаславам і Настассяю – каля выбарчага ўчастка.
«Наша Ніва» згадвае, што Часлаў дзеля змякчэння прысуду зрабіў некалькі ахвяраванняў у падкантрольныя ўладам дабрачынныя арганізацыі, а таксама ў РНПЦ траўматалогіі і артапедыі.
Пра памілаванне Часлава прасіла ягоная жонка.
Цяпер у Беларусі паводле праваабарончага цэнтру «Вясна» 1246 палітвязняў; паводле ініцыятывы «Dissidentby» – 1359.
Сцяпан Кубік belsat.eu
