25 студзеня адбылася перадача чатырох ізраільскіх закладніц, якія ўтрымліваліся ў палоне «Хамасу».
Закладніц перадавалі прадстаўнікам Чырвонага крыжа на плошчы Фаластын у Газе. Вядомыя імёны маладых дзяўчат, гэта 19-гадовая Ліра Эльбаг, а таксама 20-гадовыя Карына Арыеў, Наама Леві і Даньела Гільбоа. Яны былі захопленыя баевікамі «Хамасу» падчас нападу на тэрыторыю Ізраілю 7 кастрычніка 2023 года.
Маладых дзяўчат апранулі ў вайсковую форму. Як адзначаюць некаторыя крыніцы, гэта было зроблена наўмысна прадстаўнікамі «Хамасу», каб падкрэсліць легітымнасць іх захопу. Папярэдне меркавалася, што адна з закладніц выступіць з прамоваю (магчыма, ад яе чакалі словаў падзякі за вызваленне, адрасаваных прадстаўнікам «Хамасу»), але гэтага не адбылося.
Паводле паведамленняў Чырвонага Крыжа, стан усіх чатырох дзяўчат добры, патрэбы ў рэанімацыі няма. Пазней іх перадалі прадстаўнікам Цагаль.
Паведамляецца, што ў абмен на закладніц ізраільскі бок мае вызваліць 180 палестынскіх зняволеных.
Гэта ўжо другі абмен, які прайшоў паміж Ізраілем і «Хамасам»: у ноч на панядзелак Ізраіль вызваліў 90 палестынскіх зняволеных у абмен на трох ізраільскіх закладніц. Абмен адбыўся ў выніку ўгоды аб прыпыненні агню, што зацвердзілі ў ноч на 18 студзеня 2025 года.
Раман Шавель belsat.eu
