Беларуская АЭС пахвалілася ўключэннем у працу другога энергаблоку пасля «працаў для дыягностыкі сэнсараў». Другі блок не працаваў з 4 снежня. Першы энергаблок яшчэ толькі плануюць уключыць.
Адміністрацыя Беларускай атамнай электрастанцыі паведаміла днём 24 студзеня пра ўключэнне ў працу другога энергаблоку. На ім завяршылі «работы для дыягностыкі сэнсараў сістэмаў забеспячэння», праверылі ўсе параметры бяспекі.
Паводле крыніцы выдання «Zerkalo», другі энергаблок падключылі за дзень да гэтага раней, 23 студзеня. Яго ўжо спрабавалі падключыць 14 студзеня, але тады штосьці не спрацавала. Пад вечар 23 студзеня магутнасць перавышала 800 МВт пры поўнай магутнасці 1170 МВт. Першы энергаблок плануюць падключыць 27 студзеня.
БелАЭС, такім чынам, не выпрацоўвала энергіі 50 дзён запар. У ноч на 4 снежня 2024 года адключыўся другі энергаблок. Улады не тлумачылі прычынаў (а адміністрацыя БелАЭС прызнала адключэнне толькі 19 снежня), але знаёмыя з сітуацыяй называлі меркаванай прычынай спрацоўванне абароны праз няспраўнасць (парушэнне герметычнасці) першага контуру. Першы энергаблок на той момант ужо дзень быў на рамонце, які назвалі планавым.
Тэарэтычна, калі будуць працаваць абодва энергаблокі, БелАЭС можа забяспечваць каля 40 % патрэбаў Беларусі ў электраэнергіі. Але за 50 дзён, што станцыя не працавала, навінаў пра нейкія надзвычайныя перабоі з энергіяй не было. Тым не менш Аляксандр Лукашэнка збіраецца абмеркаваць з Уладзімірам Пуціным будаўніцтва другой атамнай электрастанцыі ў Беларусі.
Алесь Наваборскі belsat.eu
