Дзяўчынка 12 ці 13 гадоў не атрымала псіхалагічнай дапамогі, хоць раней наносіла сабе пашкоджанні. А ў дзень ейнага самагубства підагог-псіхолаг была ў стане алкагольнага ап’янення.
Арганізацыя «BELPOL» падзялілася з выданнем «Zerkalo» лістом намесніка Генеральнага пракурора Максіма Вароніна да віцэ-прэм’ера Ігара Петрышэнкі, у якім апісваецца самагубства дзяўчынкі з «дзіцячай вёскі» (дзіцячага дому, набліжанага да сямейнага тыпу) пад назвай «Вытокі», што ў пасёлку Вопытны пад Бараўлянамі ў Менскім раёне.
З ліста вынікае, што дзяўчынка была ўзростам 12–13 гадоў. Доўгі час жыла з маці, якая піла і «вяла амаральны лад жыцця». Дзяўчынку забралі ад маці, змясцілі ў Менскі раённы сацыяльна-педагагічны цэнтр. Там выявілася, што дзяўчынка наносіла сабе пашкоджанні. У ліпені 2023 года дзяўчынку перавялі ў «дзіцячую вёску», залічылі ў бараўлянскую сярэднюю школу № 3.
У лістападзе дзяўчынка скончыла жыццё самагубствам, павесілася.
«Аказанне кваліфікаванай псіхолага-педагагічнай дапамогі не забяспечана, захады ў арганізацыі вольнага часу не прымаліся, – напісаў Варонін. – У дзень гібелі непаўналетняй педагог-псіхолаг знаходзілася на працоўным месцы ў стане алкагольнага ап'янення».
Паводле яго, педагог-псіхолаг патлумачыла, што ў той дзень ужывала спіртное ў сувязі з вызваленнем сябра з турмы.
Генеральная пракуратура раней адзначалі, што колькасць дзіцячых суіцыдаў у Беларусі расце: за першую палову 2024 года 18 дзяцей скончылі жыццё самагубствам, і гэта напалову больш за той жа перыяд 2023-га. Двум наймаладзейшым дзецям, якія ўчынілі суіцыд, было па 10 гадоў.
***
Тэлефоны даверу і службаў псіхалагічнай дапамогі
- Кругласутачная экстранная псіхалагічная дапамога дзецям і падлеткам: +375 17 263 03 03.
- Кругласутачная лінія экстранай псіхалагічнай дапамогі: +375 17 352 44 44, +375 17 304 43 70.
- Кругласутачная гарачая лінія псіхалагічнай дапамогі непаўналетнім: 8 801 100 16 11.
- Крызісная інфармацыйная лінія для пацярпелых ад хатняга гвалту: +375 17 317 32 32.
- Менскі гарадскі Цэнтр памежных станаў: +375 17 360 12 70.
- Мінскі гарадскі клінічны цэнтр псіхіятрыі і псіхатэрапіі: +375 17 399 24 07 (рэгістратура).
- Кругласуткавая інфармацыйная дапамога людзям, якія знаходзяцца ў цяжкай жыццёвай сітуацыі: +375 17 311 00 00.
- Telegram-бот бяспталнай псіхалагічнай дапамогі беларусам і ўкраінцам «Давер»: @psiholog2020bot.
- Telegram-бот праекту псіхалагічнай дапамогі «Псіхолаг побач»: @stranafund_psy_Bot.
- Сэрвіс «еЗдароўе»: Okdoc.me (з Беларусі – праз VPN).
- І іншыя кантакты на сэрвісе «Адно вакно» (з Беларусі – праз VPN).
Алесь Наваборскі belsat.eu
