ЦВК Беларусі расказала, што датэрмінова на прэзідэнцкіх выбарах прагаласавалі 17,67 % людзей, якія ўлучаныя ў выбарчыя спісы. Сцвярджаецца, што столькі прагаласавалі за 21 і 22 студзеня.
Паводле ЦВК, 22 студзеня на выбарчыя ўчасткі прыйшло больш людзей, чым 21 студзеня – тады прагаласавалі 7,81 % выбарнікаў.
Спецыяльны дарадца Святланы Ціханоўскай у выбарах Аляксандр Шлык раней сказаў «Белсату», што ў шмат якіх краінах ёсць датэрміновае галасаванне. Але ў выпадку Беларусі ёсць сумневы ў звестках паводле колькасці тых, хто прагаласаваў, як і ў выніках выбараў. Бо ніякага незалежнага назірання за выбарамі няма – тое, што кажа ЦВК, проста немагчыма спраўдзіць.
Таксама ў 2020 годзе былі відавочныя прыкметы таго, што з датэрміновым галасаваннем не ўсё чыста.
«Было адрапартавана, што аж 40 % прагаласавалі датэрмінова, а людзі насамрэч хацелі прыйсці на ўчасткі ў асноўны дзень галасавання. І здарылася так, што не хапіла бюлетэняў – быццам бы хтосьці за людзей прагаласаваў датэрмінова», – сказаў Аляксандр Шлык.
Арсен Рудэнка belsat.eu
