Прэзідэнт ЗША Доналд Трамп заклікаў Расею пайсці на ўгоду, што прывядзе да заканчэння вайны. У адваротным выпадку ён абяцае ўвесці абмежаванні на ўсе расейскія тавары.
Доналд Трамп заявіў, што не хоча нашкодзіць Расеі і любіць расейскі народ.
«І ў мяне заўсёды былі вельмі добрыя стасункі з прэзідэнтам Пуціным, нягледзячы на тое, што радыкальныя левыя сцвярджаюць: «Расея, Расея, Расея». Мы ніколі не павінны забываць, што Расея дапамагла нам выйграць Другую сусветную вайну, страціўшы пры гэтым амаль 60 000 000 жыццяў. Улічваючы ўсё гэта, я збіраюся зрабіць Расеі, эканоміка якой зазнае крах, і прэзідэнту Пуціну вельмі вялікую паслугу. Дамоўцеся і спыніце гэтую недарэчную вайну!» – піша Трамп.
Ён адзначае, што сітуацыя з вайной зробіцца толькі горшаю:
«Калі мы не заключым "угоды", прычым найбліжэйшым часам, у мяне не застанецца іншага выбару, акрамя як увесці высокія падаткі, тарыфы і санкцыі на ўсё, што Расея прадае Злучаным Штатам ды іншым краінам. Давайце скончым з гэтаю вайною, што ніколі б не пачалася, калі б я быў прэзідэнтам! Мы можам зрабіць гэта лёгкім або цяжкім шляхам – і лёгкі шлях заўсёды лепшы. Прыйшоў час заключыць угоду. Больш не павінна быць страчана ні аднаго жыцця!!!»
Трамп заняў пасаду прэзідэнта ЗША другі раз 20 студзеня. Калі ён балатаваўся ў прэзідэнты, то абяцаў скончыць вайну паміж Расеяй і Украінай за адзін дзень.
Арсен Рудэнка belsat.eu
