Акруговы суд Варшавы прызначыў пажыццёвае зняволенне 23-гадоваму Дор’яну С. за згвалтаванне і забойства беларускі Лізы, а таксама абавязаў яго выплаціць кампенсацыю пацярпеламу боку. У Акруговай пракуратуры Варшавы растлумачылі «Белсату», як ён можа выплаціць гэтыя грошы.
Пацярпелым у гэтай справе прызнаны хлопец Лізы. Суд пастанавіў выплаціць яму 200 тысяч злотых (каля 48 тысяч долараў у пераліку). Прэс-сакратар Акруговай пракуратуры Варшавы Пётр Антоні Скіба паведаміў «Белсату», што асуджаны Дор’ян С. можа ўладкавацца на працу ў турме і сплачваць кампенсацыю з заробку:
,,«Асуджаны можа працаваць у папраўчай установе, і кампенсацыя можа быць спагнаная з гэтых сродкаў, гэтаксама як і з уласнасці, што ён мае».
Скіба таксама ўдакладніў, што вырак Акруговага суда Варшавы яшчэ не набыў законнай моцы:
«Прысуд не ёсць канчатковым. Калі будзе пададзеная апеляцыя, то вырак стане канчатковым пасля таго, як апеляцыя будзе разгледжаная, а вышэйшы суд зацвердзіць вырак».
Пракуратура абскарджваць пажыццёвае зняволенне для 23-гадовага Дор’яна С. не будзе:
«Паводле пракурора, прысуд ёсць справядлівым».
Пра планы падаць апеляцыю раней паведамілі адвакаты фігуранта справы. Яны напіраюць: не было даказана, што ён быў у прытомным стане ў момант злачынства.
«Гэты працэс быў праведзены, можна сказаць, экспрэс-метадам, беспрэцэдэнтным ва ўмовах польскай судовай сістэмы, што мае быць заўважана. На наш погляд, пастанова суда заўчасная. Шэраг сумневаў абароны і шэраг доказаў не былі зняпраўджаныя падчас судовага разбору».
Злачынства ў цэнтры Варшавы адбылося ў ноч на 25 лютага летась. Паводле следства, Дор’ян С. згвалтаваў беларуску і намагаўся яе задушыць. Дзяўчыну шпіталізавалі ў крытычным стане, праз шэсць дзён яна памерла.
Маладзён у сваіх паказаннях, якія ён пацвердзіў у судзе, запэўніваў, што забіваць Лізу не хацеў. Першапачаткова ён планаваў абрабаваць краму ці бар, каб здабыць грошы на аплату кватэры. Чаму ён пазбавіў дзяўчыну жыцця і згвалтаваў яе, хлопец растлумачыць не здолеў.
Пры гэтым суддзя ў прамове пасля абвяшчэння выраку адзначыў, што версію абвінавачанага зняпраўджвае запіс камеры відэаназірання. Звычайна, калі ёсць намер нешта скрасці, злачынцы хапаюць здабычу і ўцякаюць. Аднак не ў гэтым выпадку:
«Абвінавачаны не ўцякае. Ён прыціскаецца целам і проста нападае. Намер падаецца відавочным: проста абвінавачаны хоча сексуалізавана эксплуатаваць ахвяру».
На відэазапісы бачна, як маладзён спрабаваў пацалаваць Лізу, але яна адхілілася. Як паведаміў суддзя, на гэтым моманце адна з адвакатак адвярнула галаву ад экрана, бо проста не магла на гэта глядзець.
Пасля згвалтавання Дор’ян сабраў рэчы і пайшоў «спакойна і ўпэўнена». Суддзя мяркуе, што менавіта такая ўпэўненасць сведчыць: абвінавачаны ўсведамляў, што ён робіць. Таму адвакаты, якія ставілі пад сумнеў вынікі экспертызы пра стан свядомасці фігуранта, не маюць рацыі, заявіў суддзя.
Дар'я Форман, Сцяпан Кубік belsat.eu
