Прэзідэнт Украіны Уладзімір Зяленскі заявіў у аўторак, што для перадухілення новай расейскай атакі пасля пагаднення аб спыненні агню спатрэбіцца прынамсі 200 тысяч еўрапейскіх міратворцаў. Узброеныя сілы Расеі цяпер складаюць 1,5 мільёна чалавек, а Украіна мае ўдвая менш.
Украінскі лідар падчас выступу на Сусветным эканамічным форуме ў швейцарскім Давосе заклікаў еўрапейскіх лідараў рабіць больш для абароны кантыненту, перадае «Reuters». На пытанне пра ідэю міратворчага кантынгенту Уладзімір Зяленскі адказаў, колькі трэба міратворцаў.
«Ад усіх еўрапейцаў? Дзвесце тысяч, гэта мінімум. Гэта мінімум, а інакш гэта нішто», – адказаў Зяленскі і дадаў, што такія сілы будуць толькі часткай неабходных Украіне гарантыяў бяспекі.
Гэта колькасць прыблізна роўная памеру ўсіх узброеных сілаў Францыі, паводле ацэнак Міністэрства абароны Францыі ў 2020 годзе. Зяленскі сказаў, што прынамсі столькі спатрэбіцца ў якасці гарантыі бяспекі, калі ўзброеныя сілы Расеі складаюць 1,5 мільёна чалавек, а Украіна мае толькі палову гэтага ліку.
Зяленскі заявіў, што Украіна не пагодзіцца на патрабаванне Расеі рэзка скараціць колькасць украінскіх узброеных сілаў, спрагназаваўшы, што Уладзімір Пуцін запатрабуе скараціць украінскія ўзброеныя сілы да пятай часткі іх колькасці.
«Ён гэтага хоча. Мы гэтага не дапусцім», – сказаў Зяленскі.
Тэса Анэйда belsat.eu
