З 20 па 24 студзеня ў швейцарскім горадзе Давос праходзіць 55-ы Сусветны эканамічны форум. У ім удзельнічае Святлана Ціханоўская. На івэнце «Будучыня Беларусі» беларуская лідарка падзялілася бачаннем таго, як нашая краіна будзе аднаўляцца пасля дыктатуры і рухацца да эканамічнага адраджэння.
Ціханоўская прапанавала пяць практычных крокаў, якія дапамогуць Беларусі аднавіцца:
1. Стварыць умовы для вяртання на радзіму. Забяспечыць атмасферу, якая дазволіць прадпрыемствам, таленавітым прадпрымальнікам і экспертам вярнуцца ў Беларусь і прынесці з сабой фінансавы капітал, веды, досвед і кантакты.
2. Зрабіць Беларусь канкурэнтаздольным і прывабным рынкам, адкрытым для інвестараў з усяго свету.
3. Вярнуць Беларусі статус IT-краіны, вядомай выбітнымі стартапамі і ініцыятывамі.
4. Інвеставаць у новыя тэхналогіі.
5. Пачаць працэс еўраінтэграцыі і ўступіць у Раду Еўропы, каб вучыцца ў тых, хто ўжо прайшоў пераходны перыяд, скарыстацца іхнымі лепшымі практыкамі і не паўтараць памылак.
Акно магчымасцяў можа адкрыцца ў любым момант, і беларусы павінны быць да гэтага гатовымі, перакананая кіраўніца Аб’яднанага пераходнага кабінету.
,,«Таму сёння ў Давосе мы наладжваем сувязі з урадамі, парламентамі, глабальнымі карпарацыямі – гэта дапаможа зрабіць пераход хутчэйшым і плаўным. Вельмі важна, асабліва на пачатковым этапе, правесці ўсе неабходныя рэформы, падтрымаць прыватную ініцыятыву і прыцягнуць інвестыцыі ў Беларусь», – сказала лідарка беларускіх дэмакратычных сілаў.
Святлана Ціханоўская прымае ўдзел у Сусветным эканамічным форуме ў Давосе трэці раз запар. Сёлета – у асноўнай праграме і па асабістым запрашэнні прэзідэнта Форуму.
Кіраўніца АПК стане спікеркай у панэльнай дыскусіі «Мір праз сілу» разам з прэзідэнтам Фінляндыі Аляксандрам Стубам, прэм’ер-міністрам Швецыі Улфам Крыстарсанам і камандуючым аб’яднанымі сіламі НАТО ў Еўропе генералам Крыстаферам Кавалі.
Дыскусія будзе прысвечаная пытанням бяспекі ва Усходняй Еўропе. Кіраўніца Кабінету акцэнтуе ўвагу на нелегітымнасці Лукашэнкі, важнасці падтрымкі пераменаў і ўплыве Беларусі на рэгіянальную стабільнасць.
Ціханоўская сустрэнецца з прэзідэнтам Латвіі Эдгарсам Рынкевічсам: запланаванае абмеркаванне рэгіянальнай бяспекі, міжнароднай каардынацыі і непрызнання нелегітымных выбараў у Беларусі.
Таксама абраная прэзідэнтка Беларусі выступіць з прамовай пра ролю жанчынаў у стварэнні будучыні Беларусі падчас панэлі «Сусветныя лідаркі ў Давосе».
Акрамя таго, у графіку – сустрэча з Джымі Уэйлсам, заснавальнікам Wikipedia, прысвечаная барацьбе з дэзінфармацыяй, падтрымцы незалежных медыя і дакладнаму асвятленню сітуацыі ў Беларусі; круглы стол IGWEL «Вяртанне геапалітыкі жорсткай сілы» і дыскусія пра выклікі рэгіянальнай бяспекі і ролю Беларусі.
Запланаваная сустрэча з міністрам замежных спраў Францыі Жанам-Ноэлем Баро, на якой будзе абмяркоўвацца ўзмацненне санкцыяў супраць рэжыму Лукашэнкі і гуманітарная дапамога Беларусі.
Падчас мерапрыемстваў для медыяў (Washington Post, Foreign Policy, CNBC) Ціханоўская распавядзе пра сітуацыю з палітзняволенымі ў Беларусі, узмацненне рэпрэсіяў і неабходнасць міжнароднай салідарнасці ў барацьбе за свабодную Беларусь.
Марыя Міхалевіч belsat.eu
