З 5 да 8 лютага 2025 года ў Лондане пройдуць паказы тэатральнай пастаноўкі «KS6: Small Forward» з былой беларускай баскетбалісткай Кацярынай Сныцінай у галоўнай ролі.
«KS6: Small Forward» прыдумалі заснавальнікі Беларускага свабоднага тэатру Мікалай Халезін і Наталля Каляда. Назва праекту адразу кажа пра тое, што пастаноўка будзе пра баскетбольную кар’еру Сныцінай: яна выступала пад шостым нумарам на пазіцыі лёгкага форварда.
У спектаклі Кацярына іграе саму сябе і распавядае пра сваё дзяцінства, баскетбол, беларускія пратэсты ў 2020 годзе.
Паказы адбудуцца ў лонданскай студыі «The Pit», разлічанай на 164 гледачы. Усе квіткі ўжо прададзеныя. 8 лютага будзе два паказы.
Увосень 2024 года «KS6: Small Forward» быў 17 разоў паказаны ў Нью-Ёрку на тэатральнай пляцоўцы «La MaMa».
Кацярына Сныціна абвясціла пра завяршэнне баскетбольнай кар’еры ўвесну 2024 года, аднак засталася трэнеркаю ў сваёй былой лонданскай камандзе «London Lions».
Марыя Міхалевіч belsat.eu
