Жанчына ў Беларусі купіла пнеўматычную вінтоўку і з неасцярожнасці параніла сябе. Здарэнне адбылося ў Баранавіцкім раёне.
У міліцыю пра гэтае здарэнне паведамілі з шпіталю, бо абавязаныя гэта рабіць. Вядома, што 31-гадовая жанчына націснула на спускавы кручок, калі спрабавала зняць вінтоўку са сцяны, і атрымала скразное пашкоджанне рукі.
Як стала вядома sudexpert.gov.by, пнеўматычную вінтоўку пацярпелая набыла на маркетплэйсе і не думала, што яна можа ўяўляць небяспеку для здароўя.
Нагадаем, што ў верасні мінулага года ў Беларусі здарылася яшчэ адно здарэнне, звязанае з пнеўматыкаю. Жыхар Смаргоні абстраляў з вінтоўкі падлеткаў. Адзін з іх пацярпеў. Як паведамляла гарадзенская міліцыя, у дзень здарэння кампанія падлеткаў каля шматпавярховіку стала падрываць петарды. Праз гэта прачнуўся 35-гадовы мужчына. Паводле яго, ён пастанавіў разагнаць маладзёнаў і зрабіў у іхны бок тры стрэлы з пнеўматычнага пісталета металічнымі шарыкамі.
Мужчына сцвярджаў, што страляў «хаатычна», мэты патрапіць у кагосьці не меў. Тым не менш адзін з шарыкаў трапіў у грудзі 15-гадоваму хлопцу. Заведзеная крымінальная справа за хуліганства.
Надзея Вольная belsat.eu
