У Лідзе знік памятны камень з магілы ксяндза Адама Фалькоўскага, расстралянага расейскімі царскімі ўладамі 24 чэрвеня 1863 года, паведамляе Znadniemna.pl.
Акт вандалізму адбыўся напярэдадні 162-й гадавіны паўстання 1863 года, якая адзначаецца 22 студзеня.
Адсутнасць камяня на магіле ксяндза заўважылі жыхары Ліды, якія прыйшлі ўскласці кветкі і запаліць знічы. Яшчэ ўвосень 2024 года камень быў на месцы – мясцовыя жыхары прыходзілі да яго ў Дзень усіх святых.
Год таму, на пачатку студзеня 2024 года, невядомыя спрабавалі апаганіць помнік на магіле ксяндза Фалькоўскага – тады была зацёртая выява гербу паўстанцаў, які мае «Пагоню».
Царскія ўлады расстралялі ксяндза Адама Фалькоўскага 24 чэрвеня 1863 года пад Лідай за тое, што ён зачытаў маніфест паўстанцаў і заклікаў вернікаў далучыцца да паўстання. На месцы расстрэлу яго і пахавалі.
У 1940 годзе савецкія ўлады знішчылі крыж на магіле святара. У 1990-я гады крыжы працягнулі ставіць мясцовыя жыхары, аднак іх знішчалі чыноўнікі. У 2010 годзе замест крыжоў на магіле ўсталявалі мемарыяльны камень.
Марыя Міхалевіч belsat.eu
