Амбасадар МЗС Украіны ў асаблівых даручэннях у справе Беларусі і былы амбасадар Украіны ў Беларусі Ігар Кізім на сваёй старонцы ў «Фэйсбуку» пракаментаваў расследаванне «BELPOL» пад назваю «Зброевы барон», у якім раскрываецца праца беларускіх прадпрыемстваў на расейскі вайскова-прамысловы комплекс.
Кізім раіць усім паглядзець расследаванне, бо выкладзеныя ў ім факты «чарговы раз пацвярджаюць словы Лукашэнкі пра саўдзел рэжыму ў вайне і расейскай агрэсіі», а таксама дазваляюць зразумець крывадушнасць, з якой Лукашэнка гаворыць «пра сваю "міралюбнасць", а "простыя беларусы" дзякуюць яму за "мірнае і спакойнае развіццё Беларусі"».
,,«Мне цяжка сказаць, калі такія "простыя беларусы" прачнуцца і зразумеюць, як рэжым зрабіў і працягвае рабіць з іх саўдзельнікаў сваіх злачынстваў і забойстваў украінцаў, але хачу падзякаваць камандзе "BELPOL" за тое, што яны набліжаюць гэты час», – піша Кізім.
Фільм «BELPOL» «Зброевы барон: частка другая. Лукашэнка ўцягнуў Беларусь у вайну» выйшаў 19 студзеня на YouTube-канале арганізацыі былых сілавікоў.
У расследаванні ідзе гаворка пра тое, як буйныя беларускія прадпрыемствы, у тым ліку Завод дакладнай электрамеханікі, БелАЗ, БМЗ, завод «Легмаш» і іншыя, удзельнічаюць у вытворчасці снарадаў для Расеі, а менавіта для РСЗА «Град».
,,«Задача дыктатара – ператварыць Беларусь у вялікі зборачны цэх зброі і боепрыпасаў», – кажуць аўтары расследавання.
Раней у каментары «Белсату» прадстаўнік «BELPOL» Уладзімір Жыгар казаў, што ўсе прадпрыемствы Міністэрства прамысловасці Беларусі і вайскова-прамысловага комплексу працуюць у інтарэсах абароннай сферы Расеі.
«Гэта вялізная колькасць прадпрыемстваў і вялізная колькасць людзей, якія там працуюць. На жаль, цяпер Беларусь ператвараецца рукамі Лукашэнкі ў зборачны цэх, які пастаўляе сваю прадукцыю ваеннага прызначэння ў Расею, і потым гэтая прадукцыя ідзе на фронт», – казаў Жыгар.
Марыя Міхалевіч belsat.eu
